Fram­kvæmdir við Hvammsvirkjun stöðvaðar

Úrskurðurinn hefur enn ekki verið birtur en Ríkisútvarpið greinir frá. 

Í fréttatilkynningu frá Landsvirkjun segir að úrskurðurinn sé einungis til bráðabirgða. Aðeins einn verktaki sé að störfum við undirbúningsframkvæmdir Hvammsvirkjunar og fyrirséð sé að virkjanaleyfi verði gefið út í ágúst. 

„Niðurstaða úrskurðarnefndarinnar kemur ekki á óvart í ljósi dóms Hæstaréttar en Landsvirkjun telur mjög jákvætt að meðalhófs hafi verið gætt af hennar hálfu. Þannig tekur úrskurður nefndarinnar ekki til uppsetningar vinnubúða og halda þær því ótruflað áfram. 

Jafnframt segir nefndin að heimilt sé að ljúka við frágang efsta burðarlags á vegum og plönum á framkvæmdasvæðinu. Stöðvun framkvæmda hefur því eingöngu áhrif á undirbúningsframkvæmdir í frárennslisskurði en efni úr frárennslisskurði hefur verið nýtt til vegagerðar,“ segir í tilkynningunni. 

Landeigandi svartsýnn

Stöðvunarkrafan var lögð fram af landeigendum við Þjórsá í gær. Gunnar Þór Jónsson íbúi á Stóra-Núpi, sem hefur orðið hvað mest var við framkvæmdirnar, fagnar niðurstöðu nefndarinnar. Þrátt fyrir segist hann ekki bjartsýnn á að hætt verði við framkvæmdirnar endanlega.

„Það er svo mikill vilji hjá stjórnvöldum og öðrum að keyra þetta í gegn og búið að dæla svo miklum peningum í þetta þannig að það verður ekki hægt að hætta við. Túrbínutrix heitir þetta,“ segir Gunnar í samtali við fréttastofu.

Athygli vakti í dag þegar Björg Eva Erlendsdóttir framkvæmdastjóri Landverndar birti skoðunargrein á Vísi þar sem hún líkir aðferðum forstjóra Landsvirkjunar við heimilisofbeldi.

Landsvirkjun hafi lagt áherslu á ímyndasmíð, þöggun og hliðrun upplýsinga og þar af leiðandi haft áhrif á viðhorf þeirra sem ekki þekki til á svæðinu. Heimamenn upplifi hins vegar sveitina sína sem iðnaðarsvæði.

„Forstjórinn blæs á það, enda hefur hann aldrei séð neitt kvikt við Þjórsá, nema sitt fólk og oddvitann. Aðferðin minnir á hvernig heimilisofbeldi er þaggað niður. Ekkert er að, húsbóndinn segir fjölskylduna hamingjusama og sjáist áverkar á konu eða börnum, þá gengu þau óvart á hurð,“ segir í grein Bjargar. 

Björg fagnar niðurstöðunni en segir ekki hafa lesið úrskurðinn, sem verður samkvæmt umfjöllun RÚV birtur klukkan sex. 

„Annað hefði verið... Maður hefði misst trú á tilveruna, vegna þess að það var svo augljóst að þarna væri verið að virkja,“ segir Björg í samtali við fréttastofu. 

„Fyrirséð“ að virkjunarleyfi verði gefið út

Í síðustu viku óskaði Landsvirkjun eftir því að Umhverfis- og orkustofnun veitti virkjunarleyfi til bráðabirgða fyrir Hvammsvirkjun, í samræmi við nýlega breytt raforkulög og lög um stjórn vatnamála. Í fréttatilkynningu Landsvirkjunar segir leyfið í samræmi við ný lög sem samþykkt voru á Alþingi í vor. 

Í úrskurðinum kemur fram að fyrirséð sé að virkjunarleyfi til bráðabirgða verði gefið út í ágúst og það sé á forræði Landsvirkjunar að sækja um framkvæmdaleyfi fyrir undirbúningsframkvæmdum.

Landsvirkjun hafi þannig, í ljósi aðstæðna, undirbúið áframhaldandi málsmeðferð vegna öflunar nýrra leyfa eftir fremsta megni.

„Það er okkar mat að úrskurðurinn muni hafa óveruleg áhrif á undirbúningsframkvæmdir og er vonast til að ný leyfi verði veitt á næstu vikum. Áfram verður unnið að framkvæmdum í fullu samræmi við niðurstöðu nefndarinnar,“ segir í tilkynningunni. 

Fréttin hefur verið uppfærð.