Vill fá að vita hvers vegna á­kvarðanir stofnana eru ekki undir­ritaðar

Embættið hefur í kjölfarið óskað upplýsinga hjá Sjúkratryggingum Íslands, Tryggingastofnun og Vinnumálastofnun um hvort þetta sé almennt verklag hjá þeim. Ef svo er vill Umboðsmaður fá skýringar á því hvernig það samrýmist „þeim réttaröryggiskröfum sem leiða af skráðum og óskráðum reglum stjórnsýslu­réttarins“.

Í erindi Umboðsmanns til Sjúkratrygginga Íslands segir meðal annars að embættinu sé sérstaklega í huga að málsaðilar geti gert sér grein fyrir því hvaða starfsmanni stjórnvaldsins var falið að afgreiða umrætt mál, hvort hann sé til þess hæfur og afgreiðsla málsins að öðru leyti í samræmi við lög.

Bendir Umboðsmaður á að hann hafi áður komist að þeirri niðurstöðu að sú afstaða Tryggingastofnunar að birta almennt ekki nöfn starfsmanna sem stæðu að baki ákvörðunum stofnunarinnar „væri ekki í samræmi við kröfur sem gera yrði til forms og framsetningar stjórnvaldsákvarðana í ljósi réttaröryggissjónarmiða og vandaðra stjórnsýsluhátta“.