Annað á­fall fyrir and­stæðinga Ís­lands

„Við vissum að þetta yrði kapphlaup við tímann fyrir Luana Bühler og því miður verður ekkert af ævintýrum hennar á Evrópumótinu“ sagði landsliðsþjálfari Sviss, Pia Sundhage, á blaðamannafundi.

Bühler hefur verið að glíma við meiðsli allt tímabilið og lítið spilað með félagsliði sínu Tottenham á Englandi, en náði nokkrum mínútum í æfingaleik Sviss gegn Tékklandi síðasta fimmtudag, þar sem bakslagið varð.

Laia Ballesé, leikmaður Espanyol á Spáni, tekur hennar stað í hópnum. Bühler er annar lykilleikmaður Sviss sem missir af mótinu en fyrir var vitað að Ramona Bachmann yrði ekki með.

Ekki hefur blásið byrlega fyrir heimaþjóðina Sviss í aðdraganda Evrópumótsins.

Landsliðsþjálfarinn Pia Sundhage hefur verið gagnrýnd í svissneskum fjölmiðlum fyrir að láta leikmenn æfa og spila þrátt fyrir að glíma við meiðsli, og ekki munu fréttirnar af Bühler bæta úr því.

Þá tapaði liðið einnig illa í leynilegum æfingaleik, 7-1 gegn drengjaliði skipað leikmönnum fimmtán ára og yngri.

Sviss mætir Noregi í opnunarleik EM og spilar svo við Ísland á sunnudagskvöldið. Finnland er einnig með þjóðunum þremur í riðli og mætir Íslandi í fyrsta leik. Íþróttadeild Sýnar er í Sviss og færir allar helstu fréttir af mótinu á meðan því stendur.