Verðbólguvonbrigði, hrað­akstur og kokkur með keppnis­skap

Prófessor í hjartalækningum telur að góðum árangri í tóbaksvörnum sé kastað á glæ ef neysla annarra nikótínvara eykst í staðinn. Við fáum hans álit á boðaðri heildarlöggjöf um sölu á tóbaki og nikótínvörum.

Tilkynningum til barnaverndar hefur stórfjölgað. Við heyrum í barnamálaráðherra sem segir tölurnar sláandi og mikið áhyggjuefni.

Þá verður rætt við lögreglu um rassíu á Kringlumýrarbraut í gær þar sem fimm ökumenn voru sviptir réttindum fyrir hraðakstur, hittum íslenskan kokk sem stefnir á sigur í stærstu kokkakeppni heims og verðum í beinni frá Hafnarfirði þar sem verið er að undirbúa barnahátíð sem fer þar fram um helgina. Í Sportpakkanum heyrum við meðal annars í landsliðsþjálfara í hestaíþróttum sem er á lokametrunum í að velja í íslenska landsliðið fyrir HM í Sviss.

Þetta og margt fleira í opinni dagskrá á samtengdum rásum Sýnar, Bylgjunnar og Vísis klukkan 18:30.