Nýtt heims­met sett: „Sé því að ég á að geta gert miklu betur“

Vinsældir íþróttarinnar á heims­vísu hafa skotist upp frá fyrsta stóra hlaupinu árið 2011. Þá var heims­met sett upp á 18 hringi. Síðan þá hafa árin liðið og heims­met ítrekað verið slegin, alltaf er hlaupið lengra og lengra og nú er heims­metið 119 hringir. En hvað skýrir þessa bætingu?

„Í rauninni er þetta frekar ein­falt. Fólk er hægt og ró­lega að læra inn á þetta. Þetta er náttúru­lega mjög ungt sport. 2011 fer fyrsta keppnin fram og svo fer þetta upp í 50-60 hringi og fólk fer allt í einu að hugsa upp í 100 hringi. Það bætist alltaf aðeins við, fólk er að læra inn á sjálft sig, taka reynslu úr hinum keppnunum og svo bara vex þetta svona.“

En eru ein­hver tak­mörk fyrir því hversu langt er hægt að hlaupa?

„Þetta er stóra spurningin. Ef maður horfði á Phil í nótt, þegar að hann kláraði hlaupið, þá átti hann nóg eftir. Ef hann hefði fengið leyfi til að halda áfram þá væri hann ábyggi­lega enn að hlaupa. Svarið þar er bara við höfum ekki hug­mynd um það. En það á pottþétt eftir að bæta þetta heims­met. Spurningin er bara hvort að á ein­hverjum tíma­punkti þurfi að setja bara þröskuld þar sem að við 200 hringi hætti keppnin eða hvort það eigi bara að leyfa mönnum að hlaupa enda­laust. Það er bara spurning hvað verður.“

Sem ríkjandi Ís­lands­meistari í bak­garðs­hlaupum hér á landi fékk Þor­leifur boð í stærsta bak­garðs­hlaup á heims­vísu í Bandaríkjunum í október næst­komandi. Undir­búningurinn er á þá leið sem maður heldur, að hlaupa bara nógu mikið.

„Ég hef svona aðeins verið að ein­beita mér að hraðanum núna í ár. Aðeins að bæta hann. Ég er til­tölu­lega ró­legur yfir þessu. Ég fór í þessa keppni fyrir tveimur árum síðan, veit hvar þetta er og veit út í hvað ég er að fara. Þarf ekkert að vera stressaður fyrir því. Undir­búningurinn snýst dálítið um að bíða bara eftir þessu og hugsa ekkert allt of mikið út í þetta.“

Gaman væri að bæta eigið Ís­lands­met upp á 62 hringi.

„Núna eru þeir að klára 119 hringi. Ég á rétt yfir helminginn af því. Ég sé því að ég á að geta gert miklu betur út frá því.“