Sjáðu þegar Ægir fékk faðm­lag frá Messi sem skoraði svo

Myndbandið má sjá hér að neðan en Messi kom til Ægis rétt áður en hann gekk inn á Mercedes Benz leikvanginn í Atlanta, fyrir leik Inter Miami við Porto á HM félagsliða.

Faðmlagið frá unga Hornfirðingnum virtist hafa góð áhrif á Messi sem skoraði sigurmark Inter Miami úr aukaspyrnu.

Ægir greindist ungur með sjaldgæfan og ólæknandi vöðvarýrnunarsjúkdóm sem nefnist Duchenne.

Hulda Björk Svansdóttir, móðir Ægis, lýsir því á samfélagsmiðlum hvernig draumur hans frá unga aldri hafi í gær ræst með því að hitta Messi. Þessi mögulega besti fótboltamaður sögunnar gaf Ægi eiginhandaráritun á argentínsku landsliðstreyjuna sem hann klæddist og svo föðmuðust þeir.

„Þetta er dagur sem við munum geyma í hjörtum okkar að eilífu,“ skrifaði Hulda Björk með myndbandinu.

„Við upplifðum nokkuð ógleymanlegt – sannkallaða töfrastund. Þökk sé ótrúlega góðum og örlátum sálum þá fékk Ægir að hitta hetjuna sína, Lionel Messi – eitthvað sem hann hefur dreymt um síðan hann var fimm ára.

Ægir dreymdi um það sem ungur strákur að verða fótboltamaður. En lífið var með aðrar áætlanir. Þegar maður er foreldri barns með sjaldgæfan sjúkdóm þá hafa svona augnablik enn meiri þýðingu. Þau verða að heilagri stund,“ skrifaði Hulda Björk sem mun aldrei gleyma gleðisvipnum á Ægi eftir að hafa hitt sjálfan Messi.

Infantino var sömuleiðis heillaður af augnablikinu: „Það hlýjar manni svo sannarlega um hjartarætur að sjá svona. Gleðin í andliti hans er alveg einstök,“ skrifaði forseti FIFA og óskaði Ægi og Huldu alls hins besta.