Arnar fór í starfs­kynningu hjá Óskari: „Ætlum að breyta ís­lenskum fót­bolta“

Þetta kemur fram í fimmta og síðasta þætti Návígis, hlaðvarpsþátta úr smiðju Gunnlaugs Jónssonar, en tveir síðustu þættirnir eru nú komnir inn á Tal.is og aðrar streymisveitur.

Hér að neðan má hlusta á síðasta þáttinn en umræðan um heimsókn Arnars til Óskars hefst eftir 12:30 mínútur.

„Fólk kannski veit þetta ekki en ég fer til Óskars… Hann er svona 1-2 árum á undan mér í meistaraflokksþjálfun og með þetta geggjaða Gróttu-project. Ég fer til hans í raun til að sækja mér þekkingu,“ segir Arnar í þættinum.

Arnar tók við sem aðalþjálfari Víkings haustið 2018. Ári síðar hætti Óskar Hrafn með Gróttu til að taka við Breiðabliki og við tók stórkostlegt einvígi þjálfaranna og þeirra liða með skemmtun fyrir alla sem fylgdust með, sérstaklega innan vallar en eins með föstum skotum á milli manna í viðtölum, eftirminnilegri rútuferð og fleiru.

Áður en að þessu mikla einvígi kom heilsaði Arnar hins vegar upp á jafnaldra sinn Óskar á Seltjarnarnesi. Þar fékk hann, ásamt Einari Guðnasyni aðstoðarmanni sínum, að kynnast ákveðinni frumkvöðlavinnu í því hvernig þeir Óskar og Halldór Árnason, núverandi þjálfari Breiðabliks, nýttu ýmsa tækni, með myndatöku og mælingum, í sínu starfi sem þjálfarar Gróttu.

Ekki alveg mentor en...

„Óskar er fyrstur til að kenna mér á forrit og þess háttar. Segir mér frá hugmyndafræðinni sinni og ég er svolítið heillaður af því. Ég ætla ekki að taka svo djúpt í árinni að kalla hann minn „mentor“ en hann er basically að segja mér hluti…“ segir Arnar og nefnir sem dæmi undirbúning Óskars fyrir leik Gróttu við mun hærra skrifað lið Breiðabliks í deildabikarleik:

„Ég var að spyrja hann hvernig þeir ætluðu að spila á móti Blikum í kvöld. Það er ein setning sem ég man svo vel eftir frá honum: „Blikum? Við ætlum bara að pressa á þá. Við ætlum bara að spila. Ég er hérna til að breyta fótbolta á Íslandi sko.“ Maður var bara: „Ókey“,“ segir Arnar.

„Þú ert í endalausu stríði við sjálfsmyndina þína. Hvað ertu? Ertu fótboltalið sem vill pressa og vera agressívt, vera fram á við, eða ertu lið sem líður vel neðarlega á vellinum. Ég hef aldrei stýrt liði sem hefur liðið vel neðarlega á vellinum,“ segir Óskar og þetta er auðvitað augljóst í sumar af spilamennsku KR-inga.

„Dirfska hans setur mína hugsun upp á nýjan stall“

„Það skipti engu máli hvort við hefðum verið að mæta Liverpool eða Hugin/Hetti. Þú ert bara það sem þú ert, og ef þú ferð að reyna að vera eitthvað annað þá eru allar líkur á að þú verðir bara léleg eftirlíking,“ segir Óskar og það er augljóst að hann hafði mikil áhrif á Arnar sem svo skömmu síðar átti eftir að verða hans helsti keppinautur:

„Þessi dirfska hans setur mína hugsun upp á nýjan stall,“ segir Arnar. Aðstoðarþjálfari hans, Einar, kjarnar svo algjörlega það sem við tók í íslenskum fótbolta:

„Við vorum þarna í um tvo klukkutíma, bara að dunda okkur í þessu. Þegar við erum að fara tekur Óskar í höndina á okkur og segir: „Saman ætlum við að breyta íslenskum fótbolta.“ Ég held að þeir hafi nú alveg staðið við það, þeir tveir.“

Hægt er að hlusta á alla þætti annarrar seríu Návígis á Tal.is með því að smella hér.