Bóndi spurði eftir­lits­mann MAST hvort hann ætti að skjóta hann

Atvikin áttu sér stað í tveimur ferðum eftirlitsdýralæknis og dýraeftirlitsmanns MAST á sauðfjárbú í suðausturumdæmi. Þegar dýraeftirlitsmaður hóf að setja út á velferð fjárins lagði hann hendur á starfsmanninn og hætti ekki fyrr en dýralæknirinn hrópaði á hann að hætta, að því er segir í tilkynningu frá MAST.

Ekki tókst að ljúka eftirlitinu í þeirri ferð. Það tókst tveimur vikum síðar en þá voru lögreglumenn með starfsmönnum MAST í för. Þegar eftirlitsmaður sagði bóndanum frá frávikum sem komu í ljós við eftirlitið spurði bóndinn hann í tvígang að lögreglumönnum viðstöddum hvort hann ætti að skjóta hann.

Hegðun bóndans ekki einsdæmi

Matvælastofnun segist hafa kært bæði ofbeldi bóndans og hótanir hans til lögreglu. Bent er á í tilkynningu stofnunarinnar að allt að sex ára fangelsi liggi við því að beita opinberan starfsmann ofbeldi eða hóta honum ofbeldi þegar hann gegnir skyldustörfum sínum.

„Matvælastofnun lítur þessa hegðun mjög alvarlegum augum en hún er því miður ekki einsdæmi. Yfirleitt gengur þó eftirlitið mjög vel,“ segir í tilkynningunni.