Rikki G og fjöl­skylda sprengdu blöðruna

„Lítil stelpa er á leiðinni,“ skrifaði Rikki við fallegt myndskeið á Instagram. Þar mátti sjá fjölskylduna sprengja konfettíblöðru, við það þeyttist bleikt skraut um loftið og gleðin leyndi sér ekki hjá væntanlegri stóru systur.

Langt og erfitt ferli

Rikki greindi frá því í lok maímánaðar að hann og Valdís ættu von á sínu öðru barni saman. Hann hefur talað opinskátt um að þau hafi lengi reynt að eignast annað barn, en það hafi gengið erfiðlega.

„Eftir langt ferli og mikla þolinmæði mun fjölskyldan stækka síðar á árinu,“ skrifuðu þau við færslu á samfélagsmiðlum.

Rikki ræddi einlægt um samband sitt þeirra hjóna í Einkalífinu á Vísi fyrir þremur árum. Hann sagði frá því að þau hefðu verið saman frá árinu 2005, þegar hún var sautján ára og hann tvítugur. Þau gengu í hjónaband á aðfangadegi árið 2018.

Umræðan um samband Rikka og Valdísar hefst þegar 33 mínútur eru liðnar af þættinum.