Njarð­vík með öflugan endurkomusigur gegn Þór

Fyrri hálfleikur var fremur rólegur og fátt um færi en fjörið jókst stórlega í seinni hálfleik.

Þór tók forystuna á 61. mínútu eftir að hafa misnotað nokkur færi. Juan Guardia Hermida skoraði markið með föstum skalla eftir hornspyrnu á nærstöngina.

Aðeins tveimur mínútum síðar varð leikurinn jafn aftur þegar Omar Diouck stangaði boltann í netið fyrir Njarðvík.

Njarðvík gekk á lagið eftir jöfnunarmarkið og tók forystuna níu mínútum síðar, þökk sé flottum flugskalla hjá Valdimari Jóhannssyni eftir fyrirgjöf Svavars Arnar Þórðarsonar.

Viggó Valgeirsson bætti svo marki við fyrir Njarðvík rétt áður en leiknum lauk. Þór var þá búið að setja nánast allt sitt lið í sókn og fengu á sig skyndisókn sem leiddi til 3-1 taps.

Njarðvík fer með sigrinum upp í annað sæti deildarinnar, tveimur stigum á eftir ÍR sem er á toppnum með átján stig. Þór er í sjöunda sætinu með ellefu stig.