Spáir því að Fljótagöng verði næstu jarð­göng

Þetta segir alþingismaðurinn fyrrverandi, Kristinn H. Gunnarsson, nú ritstjóri Bæjarins besta, í grein í vestfirska miðlinum. Tilefni greinarinnar er auglýsing Skipulagsstofnunar í fyrradag á matsáætlun fyrir Siglufjarðarveg og Fljótagöng sem Vegagerðin hefur lagt fram.

Jafnframt opnaði Vegagerðin nýlega tilboð í rannsóknarboranir vegna Fljótaganga. Bora á þrjár kjarnaholur í sumar í áætlaðri jarðgangalínu milli Fljóta og Siglufjarðar og á borunum að vera lokið fyrir 1. október í haust.

Með átján ára þingreynslu að baki fyrir þrjá stjórnmálaflokka, og sem þingflokksformaður tveggja þeirra, þekkir Kristinn vel hvernig kaupin geirast á eyrinni í pólitíkinni og ætti að teljast vel læs í þau teikn sem birtast.

Kristinn segir Eyjólf Ármannsson innviðaráðherra ítrekað hafa neitað að svara til um hver forgangsröðun ríkisstjórnarinnar væri í jarðgangagerð. Hann hafi vísað til nýrrar samgönguáætlunar sem lögð verði fram í haust.

„Nú þýðir ekki lengur að dyljast í þessu máli, ríkisstjórnin er búin að taka sína ákvörðun, fjórðu jarðgöngin til Siglufjarðar eru á undan næstu jarðgöngum á Vestfjörðum,“ segir Kristinn.

Eins og búast mátti við af fyrrum þingmanni Vestfjarða og Norðvesturkjördæmis og núverandi ritstjóra héraðsmiðils Vestfirðinga er kjarninn í málflutningi Kristins í jarðgangakapphlaupi landshlutanna að draga fram brýnni þörf á jarðgöngum fyrir vestan. Um leið segir hann enga þörf á Fljótagöngum.

„Rök Vegagerðarinnar um ástand vegarins um Almenninga eru veigalítil. Þótt sá vegur sígi og jafnvel í framtíðinni verði ónothæfur er hann ekki brýnn, hvorki fyrir Siglfirðinga né þá fáu sem búa í Fljótunum. Siglfirðingar sækja alla sína þjónustu, að eigin ósk, í Eyjafjörðinn um Héðinsfjarðargöng og Fljótamenn búa við láglendisveg til Skagafjarðar. Það þarf því engin jarðgöng. Þessi málflutningur Vegagerðarinnar er frekar pólitískur en faglegur.

Þörf fyrir jarðgöng eru víða brýn á landinu og miklu mun brýnni en í Fljótunum. Það seinkar öðrum brýnni jarðgöngum að verja 21 milljarði króna í þessi lítt nauðsynlegu göng,“ segir Kristinn í grein sinni í BB.

Í viðtali á Stöð 2 í byrjun ársins vildi Eyjólfur Ármannsson innviðaráðherra ekki svara því hvort Fjarðarheiðargöng milli Seyðisfjarðar og Egilsstaða yrðu áfram efst á forgangslista nýrrar jarðgangaáætlunar, tók raunar sérstaklega fram að hann væri óbundinn af fyrri áætlun. Hann sagði einnig opið að velja annan jarðgangakost á Austfjörðum. Allt væri uppi á borðinu hvað þetta varðar.

Hér má rifja upp hvað ráðherrann sagði í janúar:

Í þættinum Um land allt á Stöð 2 árið 2022 heyrðum við óskir Fljótamanna: