Nemandinn sem stakk Ingunni ní­tján sinnum: Segir „tækni­lega séð mögu­legt“ að hann geri það aftur

Aðalmeðferð í málinu fór fram í lögmannsréttinum í Borgarþingi í Ósló í lok maí. Stúdentinn, sem er 24 ára gamall og var nemandi Ingunnar, áfrýjaði dóm sem féll á síðasta ári sem kvað á um sjö og hálfs árs „forvaring“ svokallað sem er norskt refsiúrræði sem heimilar yfirvöldum að halda afbrotamönnum í vistun eftir afplánun fangelsisdóms. Hann var auk stunguárásarinnar fólskulegu dæmdur fyrir grófa líkamsárás gegn lektor í háskólanum.

Viðmót kennarans eftir skróp átyllan

Fyrir lögmannsréttinum sagði stúdentinn, sem ekki hefur verið nafngreindur, að stunguárásin hafi verið „eina undankomuleiðin.“ Hann hafði lengi haft óbeit á Ingunni. Kennslan og viðmót hennar eftir að hann hafði skrópað í próf og endurtökupróf í fagi sem Ingunn kenndi fóru fyrir brjóstið á honum.

„Ég var hræddur um að Ingunn yrði þarna í margar annir í viðbót. Það fór ekki gott orð af henni, líka meðal samnemenda sem ég spjallaði við, og mér fannst ég ekki geta leyft þessu að halda áfram,“ sagði hann.

Samkvæmt umfjöllun Khrono fór hann á fund Ingunnar á skrifstofu hennar með tvo hnífa, einn stærri og einn minni. Þann síðarnefnda notaði hann til að stinga Ingunni nítján sinnum. Fyrir dómi sagði stúdentinn að hann hefði ekki ætlað sér að beita hnífunum en að hann hefði vitað að það myndi róa hann að hafa þá á sér.

Gæti „tæknilega séð“ gert það aftur

Áfrýjunardómurinn tekur það aðeins fyrir að hann hafi verið dæmdur í öryggisvistun, þessa fyrrnefndu forvaring, og ekki málsatvikin sjálf. Miklum tíma var því varið í að komast að því hvort stúdentinn væri fær um að fremja slíkan verknað aftur. Hann sjálfur sagði það ekki skipta hann öllu máli hvort hann verði dæmdur í öryggisvistun eða ekki. Það hafi ekki verið þess vegna sem hann áfrýjaði dómnum sem hann hlaut.

„Í dómnum er ýmislegt fullyrt sem er ekki rétt eins og að ég hafi sagt að það sem gerðist væri réttlætanlegt. Það sagði ég ekki. Það stendur líka að ég hafi ekki beðist afsökunar. Það er augljóslega ekki satt því ég hef verið samvinnufús í gegnum allt ferlið,“ sagði hann.

Stúdentinn var spurður blátt áfram hvort mögulegt væri að hann fremdi slíkan verknað aftur.

„Ég ætla að gera allt til þess að koma í veg fyrir það að gera þetta aftur. En ég hélt heldur ekki að ég myndi gera það þá, þannig tæknilega séð get ég ekki sagt neitt um hvort ég komi til með að gera það aftur því það veit ég ekki fyrir víst. En mig langar ekki að gera það aftur,“ sagði hann.

„En ég myndi segja að líkurnar séu næstum engar, en það er tæknilegur möguleiki,“ sagði hann svo.

„Ég er með svarta beltið í tækvandó“

Ingunn lýsti atburðarásinni þennan örlagaríka dag í ágúst 2023 fyrir áfrýjunardómstólnum. Hún sagðist ekki hafa verið hrædd við árásarmanninn og að hún áleit hann vera rólyndan mann allt þar til árásin átti sér stað. Hún lýsti því að þegar hún gaf það til kynna að fundi hennar og nemandans væri slitið og stóð upp frá stól sínum hefði nemandi hennar mundað hníf og haldið upp að hálsi hennar. Þá hefði lektor við háskólann sem var einnig viðstödd fundinn stokkið á bak árásarmannsins og reynt að ná af honum hnífnum.

Stúdentinn sagðist hafa valið hvar hann hafi stungið hana til að koma í veg fyrir að hún myndi láta lífið.

„Þegar ég ákvað að munda hnífinn sá ég bara búkinn hennar og höfuð. Ég hugsaði ekki mikið um útlimina. Ég mat það sem svo að neðri hluti búksins væri minnst hættulegi staður sem ég gæti stungið. Ég hef reynslu af bardagaíþróttum og svarta beltið í tækvandó, þannig að ég veit hvað ég þarf að gera til að fá hann almennilega inn,“ sagði hann.

Finnst fínt að vera í fangelsi

Sálfræðingarnir Torgeir Husby og Alexander Rønningsdalen Flaata báru vitni fyrir dómi en þeir lögðu mat á sakhæfi árásarmannsins. Eftir að hafa heyrt framsögn árásarmannsins sögðu þeir lítið hafa breyst frá því að þeir mátu sálarástand árásarmannsins haustið 2023.

„Hann hefur ekki raunverulegan skilning á því að hann er ekki bara hluti af vandamálinu heldur er hann vandamálið. Þannig upplifir hann þetta ekk. Hann áttar sig á einhverjum atriði en ég vil meina að hann finni ekki fyrir raunverulegri eftirsjá,“ sagði Husby.

Sjá einnig: Á­rásar­maður Ingunnar iðrast einskis

Árásarmaðurinn var greindur með Aspergersheilkenni þegar hann var metinn sálfræðilega eftir handtöku hans. Sálfræðingarnir bentu á það að það auki ekki líkurnar á ofbeldisfullri hegðun. Því veldur það þó að hann er ekki fær um að ljúga eða sníða málflutning sinn fyrir dómi af neinni kænsku.

Líkt og fyrr segir skiptir það árásarmanninn ekki miklu hvort hann sæti öryggisvistun eður ei.

„Honum finnst raunar fínt að vera í fangelsi. Hann gæti verið eins lengi og hægt er. Það er ansi dæmigert reglufasti hversdagurinn henti einhverfu fólki vel og að það kunni betur að meta það en óreiðan utan veggjanna,“ sagði læknirinn Håkon Moen Schjelle sem bar vitni fyrir dómi.

Sefur illa eftir árásina

Ingunn Björnsdóttir sagði eftirmála hnífstunguárásarinnar umfangsmikla og trámatíska. Hún verji stærsta hluta tímans síns á Íslandi þrátt fyrir að starfa áfram við Óslóarháskóla.

„Ég sef illa. Ég fæ martraðir. Ég man það ekki en vakna sveitt. Einbeitingin mín er skert og athyglisgáfan. Ég á í erfiðleikum með hnífa,“ sagði hún.

Hún lýsti jafnframt líkamlegum eftirmálum árásarinnar. Vinstri handleggur hennar er dofinn þar sem hún var ítrekað stunginn, sama gildir um hægri fótlegg. Hún glímir einnig við mikla verki í lærvöðvanum sem hún telur stafa af því að hún beiti sér öðruvísi eftir árásina.

Hún sagði að það væri hræðilegt að koma aftur fyrir dóm og endurupplifa árásina.

„Þess hef ég ekki hlakkað til,“ sagði Ingunn Björnsdóttir.