Erlent

Telur að enginn hafi komist lífs af úr flug­slysinu

Kjartan Kjartansson skrifar
Hluti af væng farþegaþotu Air India á slysstað í Ahmedabad á Indlandi.
Hluti af væng farþegaþotu Air India á slysstað í Ahmedabad á Indlandi. Vísir/EPA

Lögreglustjórinn í Ahmedabad á Indlandi segir að svo virðist sem að enginn hafi komist lífs af í farþegaþotunni sem hrapaði í íbúðahverfi í borginni í dag. Einhver fjöldi íbúa þar sem vélin brotlenti hafi einnig farist.

Nákvæmar tölur um mannskaða liggja enn ekki fyrir en 240 manns voru um borð í Boeing 787-8 Dreamliner-þotu Air India. Flestir þeirra voru Indverjar en einnig voru tugir Breta um borð auk Portúgala og eins Kanadamanns.

Flugvélin hrapaði aðeins fimm mínútum eftir flugtak. Veðuraðstæður eru sagðar hafa verið góðar og engin dæmi eru um að þotur af þessari gerð hafi brotlent með þessum hætti áður.

„Það virðist sem enginn hafi komist lífs af úr flugslysinu,“ hefur AP-fréttastofan eftir G.S. Malik, lögreglustjóra í Ahmedabad, rúmlega fimm milljóna manna borg á norðvestanverðu Indlandi.

Þotan er sögð hafa lent á gistiheimili fyrir lækna. Breska ríkisútvarpið BBC hefur eftir indverskum stjórnmálamanni frá svæðinu að tekist hafi að bjarga fjölda lækna úr byggingunni. Þá sagði móðir eins þeirra að sonur hennar hefði bjargað sér með því að stökkva út um glugga á annarri hæð gistiheimilisins. Hann hafi slasast en komist lífs af.

Narendra Modi, forsætisráðherra Indlands, segir þjóðina slegna og hrygga vegna slyssins. Ríkisstjórnin og héraðsyfirvöld vinni saman að því að hjálpa þeim sem eigi um sárt að binda.

Fréttir af flugi Indland

Mest lesið


Fleiri fréttir

Sjá meira


×

Mest lesið