Pharoahe Monch með De La Soul á Lóu

„Tónlistarunnendur geta farið að telja niður því goðsagnakennda hiphop-sveitin De La Soul hefur loksins sent yfir nákvæma nafnaskrá sína. Og það sem toppar þetta allt, Troy Jamerson, betur þekktur sem Pharoahe Monch, verður með þeim á sviðinu,“ segir Benedikt Freyr Jónsson, einn skipuleggjenda hátíðarinnar.

Hann segir þetta risa tíðindi fyrir unnendur klassísks og kraftmikils hiphops.

„Jamerson er þekktur fyrir einstaka rödd, djúpa textasmíði og orkumikla sviðsframkomu. Hann sló fyrst í gegn með Organized Konfusion og hefur síðan markað sér stöðu sem einn af virtustu textasmiðum rappheimsins. Að hann komi fram með De La Soul, í fyrsta sinn á Íslandi, er ótrúlega sérstakt tilefni.“

Hann segir skipulagningu hátíðarinnar ganga afar vel.

„Hátíðin verður einstakur viðburður þar sem tónlist og matargerð mætast í sumarstemningu og fjölbreyttri upplifun.“

Á hátíðinni koma fram Jamie xx, Mos Def, De La Soul, Joy Anonymous, Skratch Bastid, Mobb Deep, GDRN, Inspector Spacetime, Saint Pete, Hildur og fleiri.