Trump sendir þjóðvarðlið til Los Angeles

Sérfræðingar segja í samtali við LA Times að til að virkja þjóðvarðlið Kaliforníu, sem heyrir í raun undir ríkisstjórann, sé Trump að beita lagaákvæði sem hafi sjaldan verið beitt áður. Óljóst sé hvort hann megi þetta yfir höfuð og ljóst sé að málaferli séu í vændum vegna þessa.

Newsom segir staðbundin löggæsluembætti í stakk búin til að takast á við mótmælin og löggæslufólk hafi gert það vel hingað til. Hann segir markmið Trump-liða með því að senda hermenn á vettvang sé að valda stigmögnun og auka á spennuna í Los Angeles.

Newsom hefur biðlað til mótmælenda að sýna stillingu og gefa Trump-liðum ekki frekara tilefni til stigmögnunar. Það væri það sem þeir vildu.

Óljóst er hvenær þjóðvarðliðið á að mæta til borgarinnar.

Segir landgönguliða næsta

Í tilkynningu frá Hvíta húsinu sem send var út í gærkvöldi segi að aðgerðum ICE sé ætlað að vinna bug á innrás glæpamanna í Bandaríkin og að „gagnslausir“ vinstri sinnaðir leiðtogar Kaliforníu hafi brugðist skyldu þeirra að verja íbúa ríkisins.

Þess vegna væri Trump að senda þjóðvarðlið á vettvang, þar sem glæpastarfsemi hefði verið leyft að blómstra, samkvæmt Karoline Leavitt, talskonu Trumps.

„Ríkisstjórn Trumps hefur ekkert umburðarlyndi glæpsamlegri hegðun og ofbeldi, sérstaklega þegar því er beint að löggæslumönnum sem eru að vinna störf sín.“

Alríkissaksóknarar í Kaliforníu hafa heitið því að bera kennsl á mótmælendur sem brjóti lögin og lögsækja þá.

Pete Hegseth, varnarmálaráðherra, sagði í nótt að til greina kæmi að senda landgönguliða til Los Angeles.

Í færslu sem hann skrifaði á X sagði ráðherrann að ofbeldi gegn útsendurum alríkisins og skemmdarverk á eignum yrði ekki liðið undir stjórn Trumps. Þess vegna væri verið að senda þjóðvarðliða til LA og ef það dugði ekki til yrðu landgönguliðar sendir.

Newsom skrifaði í kjölfarið eigin færslu á X þar sem hann vísaði til orða Hegseths um að senda landgönguliða gegn bandarískum ríkisborgurum.

„Þetta er sturluð hegðun.“

Mótmæli og átök

Síðustu daga hefur komið til mótmæla og jafnvel átak í LA í tengslum við umfangsmikil áhlaup þungvopnaðra útsendara ICE og annarra alríkisembætta í borginni. Tugir manna hafa verið handteknir í þessum áhlaupum.

Sjá einnig: Mótmæli og átök eftir áhlaup ICE í Los Angeles

Trump hefur verið sagður ósáttur við hve illa gengið hefur að vísa fólki sem dvelur ólöglega í Bandaríkjunum úr landi og er áhlaupunum í LA og víðar um Bandaríkin ætlað að auka þann fjölda.

Todd Lyons, yfirmaður ICE, varði aðferðir stofnunarinnar fyrr í vikunni og sagði þá að verið væri að handtaka um 1.600 manns á degi hverjum. Um væri að ræða hættulega glæpamenn.

Köstuðu grjóti að löggæslumönnum

Spennan jókst svo í gær þegar útsendarar ICE gerðu fleiri áhlaup í LA og úthverfum og þá sérstaklega í borginni Paramount. Stór hluti íbúa þar er af latneskum uppruna og kom til umfangsmikilla mótmæla.

Fjöldi fólks kom saman í bænum þar sem útsendarar ICE voru og köstuðu meðal annars grjóti að löggæslumönnum og var kveikt í að minnsta kosti einum bíl, samkvæmt AP fréttaveitunni.

Löggæslumenn svöruðu með því að beita táragasi, hvellsprengjum og piparúða, auk þess sem þeir notuðust við gaddavír til að stöðva mótmælendur, sem kölluðu eftir því að útsendarar ICE færu frá Paramount.

AP hefur eftir Peggy Lemons, borgarstjóra Paramount, að fólk sé óttaslegið yfir aðgerðum ICE þar. Það komi henni ekki á óvart að óreiða hafi fylgt starfsmönnum stofnunarinnar, miðað við það hvernig þeir hafi haldið á spöðunum.