„Erum ekki dúkkur sem Snorri getur sagt fyrir verkum“

Vísir greindi frá því að við atkvæðagreiðslu á lögum um námsmat grunnskóla hafi Kolbrún, sem mælti fyrir málinu á sínum tíma, látið þess svo getið að nefndarstörf hafi gengið vel ef frá væri talin tilraun minnihlutans til að fá handbendi sín fyrir nefndina.

„Fyrir utan að fá einhverjar fjóra unga krakka í framhaldsskóla sem búið var að sér velja og mögulega segja þeim hvað þau áttu að segja fyrir framan þingnefndina,“ sagði Kolbrún.

Nú varð mikið kurr í þingsalnum. En Kolbrún brýndi þá raust sína.

„Það kom auðvitað ekki til greina.“

Ein þessara „ungu krakka“ er Diljá Kjerúlf sem er fyrrverandi inspector scholae hjá MR en hún útskrifaðist þaðan í vor.

„Ég er alls ekki sátt. Að háttvirtir meðlimir Alþingis láti svona orð falla í þingsal. Þau áttu kannski að vera særandi fyrir Snorra Másson og flokkinn hans en ásakanirnar lenda á okkur saklausum,“ segir Diljá sem veit vart hvaðan á sig stendur veðrið.

Snorri varla valið varaformann Ungra vinstri grænna 

Með Diljá var Úlfhildur Elísa Hróbjartsdóttir og hún segir þetta alrangt með farið hjá Kolbrúnu.

„Snorri valdi okkur ekki. Ef Kolbrún hefi kynnt sér þetta eitthvað þá hefði hún komist að því að ég er varaformaður Ungra vinstri grænna. Snorri hefði tæplega valið mig ef hann hefði vitað það.“

Úlfhildur, sem er ári yngri en Diljá, segir þetta koma illa við sig að vera sökuð um svona nokkuð.

„Að segja að við séum einhverjar dúkkur sem Snorri getur sagt fyrir verkum er óvirðing. Og hvorki Snorri né nokkur annar veit mínar skoðanir á samræmdu prófunum. Það veit enginn. Þetta dregur úr því að börn og ungmenni þori að segja sitt. Það er bara ekki í lagi að það sé umræða um okkur á þessum nótum á Alþingi,“ segir Úlfhildur.

Algerlega tilhæfulaus ummæli og vilja afsökunarbeiðni

Dilja segir ummælin algerlega tilhæfulaus. Meirihlutinn hafi fellt það á sínum tíma, fyrir mörgum mánuðum, að þau fengju að koma fyrir nefndina svo mikið sem. Þá segist hún ekki, ekki frekar en Úlfhildur, fylgja Snorra að málum. Hún hafi einfaldlega fengið símtal frá konrektor sem hafi valið hana ásamt öðrum til að fara.

„Hann mælti með mér af því að ég var forseti MR, var í Morfís og hef sterkar skoðanir á þessu.“

Þetta er fyrir mörgum mánuðum og því komu ummælin nú flatt upp á þær Diljá og Úlfhildi. Þeim finnst sem þær hafi saklausar orðið fyrir skeyti þingmannsins, sem beindist að Snorra og Jóni Zimsen en þær óvart orðið fyrir bombunni - „Collateral Damage“. „Ég er ekkert yfir mig brjáluð, þetta er fyndið og galið í senn. En það er alvarlegur undirtónn í þessu máli,“ segir Diljá.

Báðar telja þær mikilvægt að raddir nemenda heyrist en það varð ekki – ekki að þessu sinni. 

Diljá vill að endingu krefjast þess að hin virðulega Kolbrún sendi þeim öllum persónulega afsökunarbeiðni.

„Það væri alla vega vel metið.“