Guð­jóni Val tókst ekki að hjálpa löndum sínum

Þetta var síðasti leikurinn í næstsíðustu umferð deildarinnar en lokaumferðin fer síðan fram um helgina.

Magdeburg hafði tekið toppsætið af Füchse Berlin með sigri í gærkvöldi en Füchse er eftir þennan sigur með eins stigs forskot á Magdeburg fyrir lokaumferðina á sunnudaginn.

Magdeburg spilar þá á útivelli á móti SG BBM Bietigheim á sama tíma og Füchse Berlin er í heimsókn til Rhein-Neckar Löwen. Bietigheim er lakara lið (15. sæti) en Löwen er í níunda sæti deildarinnar.

Füchse Berlin vann leikinn í kvöld á endanum með tíu marka mun, 45-35, eftir að hafa verið sjö mörkum yfir í hálfleik 22-15.

Guðjón Valur Sigurðsson þjálfar lið Gummersbach sem er í sjöunda sæti deildarinnar eftir þetta tap og getur ekki komist ofar.

Gummersbach var búið að vinna fjóra leiki í röð fyrir leikinn í kvöld og því voru smá vonir um að liðið gæti hjálpað öðru Íslendingaliði með því að taka stig af Berlínarliðinu.

Teitur Örn Einarsson skoraði sex mörk fyrir Gummersbach og Elliði Snær Viðarsson var með eitt mark.

Mathias Gidsel var frábær að venju með Füchse en hann skoraði ellefu mörk úr aðeins þrettán skotum og gaf sex stoðsendingar.