Hættur eftir að hafa spilað með 42 liðum

Louis spilaði fótbolta í 28 ár og óhætt að segja að hann hafi verið mikið á ferðinni því honum var skipt á milli félaga alls 51 sinni.

Louis hóf ferilinn með Risborough Rangers árið 1996, þá 17 ára gamall, og lék í gegnum ferilinn með liðum í neðri deildum Englands. Hann lék til að mynda með Oxford United, Mansfield Town, Wrexham, Crawley Town, Lincoln City og mörgum öðrum.

Hann skoraði í eftirminnilegum sigri Oxford gegn Swindon Town í 2. umferð enska bikarsins árið 2002 og fékk þá að mæta uppáhaldsliðinu sínu, Arsenal, og það á Highbury, í leik sem þó tapaðist 2-0.

„Það var draumurinn minn að verða atvinnumaður í fótbolta. Ég náði að spila á frábærum völlum og með frábærum leikmönnum, og þegar á leið kynntist ég dásamlegu fólki á ferðum mínum og það hélt mér hungruðum,“ sagði Louis við BBC.

„Ég á góðan vinahóp sem hefur virkilega hvatt mig til að komast í gegnum dimmu dagana og berjast fyrir meiru. Ég er búinn að spila í langan tíma og hlýt að hafa gert eitthvað rétt því það eru enn í dag stjórar að hafa samband og biðja mig um að koma og spila fyrir þá,“ sagði Louis.

Hann er hins vegar hættur að spila en ætlar að halda sig við fótboltann og verður aðstoðarþjálfari hjá Slough Town FC.