Dagur Árni fetar í fót­spor pabba síns

Dagur Árni hefur þrátt fyrir ungan aldur verið algjör lykilmaður í liði KA og skoraði hann 132 mörk fyrir liðið á síðustu leiktíð í Olís-deildinni.

Þá er hann einn af lykilmönnum U19-landsliðs Íslands sem spilar í lokakeppni HM í ágúst. Hann var valinn í úrvalsliðið á EM í fyrrasumar þegar Ísland endaði í 4. sæti.

Óhætt er að segja að Dagur Árni sé úr mikilli handboltafjölskyldu því mamma hans er Martha Hermannsdóttir og pabbi hans Heimir Örn Árnason, sem bæði léku um langt árabil í efstu deild hér á landi og eiga einnig að baki landsleiki. Heimir spilaði einmitt með Val á sínum tíma, við góðan orðstír.

Dagur Árni er fyrsti nýi leikmaðurinn sem Valur kynnir til leiks eftir að Ágúst Jóhannsson tók við sem þjálfari karlaliðs félagsins:

„Ég er gríðarlega ánægður með að fá Dag Árna til liðs við félagið. Hann er ungur og mjög efnilegur leikmaður með mikla hæfileika og frábært viðhorf. Hann getur náð mjög langt en um leið þurfum við að gefa honum tíma til að aðlagast hjá félaginu og um leið þeim breytingum sem því fylgir að flytja á milli landshluta. Ég hlakka til samstarfsins við hann líkt og aðra leikmenn liðsins,“ sagði Ágúst.