Banna alla sem taka þátt í Steraleikunum

Steraleikarnir (e. The Enhanced Games) er viðburður sem ástralski auðjöfurinn Aron D'Souza stendur fyrir. Stefnt er á að halda þá í fyrsta skipti í Las Vegas á næsta ári. Þar verða engin lyfjapróf og íþróttafólkið kemst því upp með að neyta ólöglegra lyfja til að auka afreksgetu sína.

Undanfarið hafa væntanlegir keppendur á Steraleikunum verið að sýna styrk sinn, tekið þátt í æfingabúðum og óformlegum keppnum.

Skipuleggjendur leikanna héldu því nýlega fram að gríski sundkappinn Kristian Gkolomeev hafi synt 50 metra skriðsund á tímanum 20,89 sekúndum í lokuðum æfingabúðum. 0,02 sekúndum hraðar en Brasilíumaðurinn Cesar Cielo gerði þegar hann setti heimsmet í greininni árið 2009.

Keppendur á sterum geta auðvitað ekki tekið þátt í venjulegum íþróttamótum þar sem er lyfjaprófað, en hafa valmöguleikann á því að hætta lyfjanotkun og snúa aftur til keppni í sinni íþrótt.

Nú hefur sundsambandið hins vegar sett bann við því. BBC greinir frá.

„Einstaklingar sem styðja, auglýsa eða taka þátt í íþróttaviðburðum þar sem lyfjanotkun er leyfð eða öðrum óhefðbundnum aðferðum er beitt mega ekki starfa fyrir alþjóðasundsambandið eða taka þátt í keppnum eða viðburðum á vegum þess“ segir í nýju viðurlögum sambandsins.