Innlent

Lögðu hald á nokkuð magn fíkni­efna og hnífa

Jón Ísak Ragnarsson skrifar
Mennirnir voru handteknir í grennd við Skagaströnd.
Mennirnir voru handteknir í grennd við Skagaströnd. Vísir/Vilhelm

Lögreglan á Norðurlandi vestra naut aðstoðar sérsveitar ríkislögreglustjóra þegar tveir karlmenn á þrítugsaldri voru handteknir á bæ nálægt Skagaströnd í gær. Lagt var hald á nokkuð magn fíkniefna og hnífa í tengslum við málið.

Lögreglan á Norðurlandi vestra greinir frá því í tilkynningu að hinir handteknu hafi verið vistaðir í fangageymslum þangað til í dag, og rannsóknardeild lögreglustjórans á Norðurlandi vestra fari með rannsókn málsins.

Snorri Geir, varðstjóri hjá lögreglunni á Norðurlandi vestra, segir að mennirnir tveir hafi verið látnir lausir að lokinni skýrslutöku í morgun.

Hann segir að mennirnir hafi staðið í hótunum og þess vegna hafi verið kallað til sérsveitarinnar og þeir handteknir í kjölfarið. Við leit í bílum þeirra hafi fundist talsvert magn fíkniefna og hnífa. Þeir hafi þó ekki ógnað neinum með hníf.

Um sé að ræða íslenska menn á þrítugsaldri.

Rannsókn málsins sé á frumstigi.




Fleiri fréttir

Sjá meira


×