Ná­vígi með Gulla Jóns: Auka­efni úr A&B og meira til

Sjónvarpsþættirnir um Arnar og Bjarka voru fjórir talsins, tæpur klukkutími að lengd hver. Gunnlaugur og aðstandendur þáttanna sátu á miklu efni sem rataði ekki í þættina og ákveðið var að nýta þá til hlaðvarpsgerðar.

„Hugmyndin vaknar þegar við erum nánast að klára fyrsta þáttinn af A&B. Þá fæ ég hringingu frá Frey Árnasyni sem stjórnaði eftirvinnslunni þáttanna og klippararnir fengu eiginlega þessa hugmynd hvort ég ætti ekki að gera hlaðvarpsseríu í framhaldi af þáttunum. Það væru of margar sögur sem kæmust ekki að,“ segir Gunnlaugur í samtali við Vísi. 

„Ég var ekkert endilega á því en þegar við vorum að klára þættina bar ég þetta undir tvíburana. Þeir voru ekkert alltof hrifnir en báðu allavega um að þættirnir myndu heita eitthvað annað. Þá fór hugmyndin á annan stað og við útvíkkuðum þetta aðeins; þetta væru ekki bara Arnar og Bjarki heldur færi í aðrar áttir. Þá vaknar eiginlega þetta verkefni. Ég ákvað að taka fleiri og ný viðtöl. Upphaflega áttu þetta að vera fjórir þættir en urðu sex.“

Þættirnir bera nafnið Návígi líkt og hlaðvarpsþættir sem Gunnlaugur gerði fyrir Fótbolta.net 2018. Í raun er því um að ræða aðra þáttaröð af Návígi. Þættirnir eru unnir í samstarfi við Stöð 2 Sport og Tal.

„Það voru mjög margar sögur sem komust ekki að. Við vorum með fjóra fimmtíu mínútna þætti og það er mjög margt sem maður hefði viljað sjá í sjónvarpi en er frábært að geta notað í hlaðvarpi. Þetta eru þematengdir þættir,“ segir Gunnlaugur og fer svo í innihald þáttanna sex. Sveitungi og vinur Gunnlaugs, Hjörtur Hjartarson, er meðstjórnandi Gunnlaugs í fyrstu fimm þáttunum. 

„Í fyrsta þættinum sem ég kalla Akranes eru Arnar og Bjarki í stóru hlutverki en við förum einnig út fyrir sviðið og tökum fyrir umhverfið sem þeir ólust upp í. Í öðrum og þriðja þættinum er Bjarki í aðalhlutverki. Við tökum atvinnumennskuna frá öllum hliðum. Í þáttum fjögur og fimm fáum við Gumma Ben með okkur og þá tökum við Arnar og Óskar Hrafn Þorvaldsson frá yngri flokkum, upp í meistaraflokk og þjálfun og gerum því góð skil. Ég tók nýtt viðtal við Óskar Hrafn sem við blöndum við viðtöl við Arnar og Bjarka því þetta er kafli sem komst ekki að í sjónvarpinu; þessi rosalegi slagur Breiðabliks og Víkings.“

Í sjötta og síðasta verður fjallað um gerð íþróttaefnis í sjónvarpi og fær Gunnlaugur til sín teymið sem vann A&B; áðurnefndan Frey Árnason, tökumanninn Sigurð Má Davíðsson og framleiðandann Garðar Örn Arnarson.

Fyrsti þátturinn af Návígi fer í loftið á morgun og verður aðgengilegur á öllum helstu hlaðvarpsveitum. Annar þátturinn kemur svo á miðvikudaginn og þættirnir verða vikulega nema hvað þættirnir með Arnar og Óskar Hrafn verða í sömu vikunni.