Alda Karen keppir í hermiakstri

Alda Karen greinir frá þessu í Facebook-færslu.

„Vitiði þegar maður prófar eitthvað, reynist vera frekar góður í því, heldur áfram og ert skyndilega kominn í opinbera deild? Já, það gerðist,“ skrifar hún í færslunni.

„Ég er ánægð að tilkynna að ég er nú F1 hermi-ökuþór í New Jersey-deildinni, sem byrjar 27. maí. Næstu sex vikurnar verða hrottalegar og örugglega auðmýkjandi en hey, ég lofa að ég mun skemmta mér konunglega,“ segir í færslunni.

Hermarnir sem notaðir eru í hermiakstri eru mjög raunverulegir og til eru mörg dæmi um ökuþóra sem hafa fært sig úr hermum yfir í raunverulegan kappakstur. Eitt dæmi um slíkt er Bretinn Jann Mardenborough sem fór úr því að spila Gran Turismo-tölvuleikina yfir í Formúlu 3 í kvikmyndinni Gran Turismo frá árinu 2023.

Hérlendis var keppt í stafrænni aksturskeppni Formúlu 4 í síðustu viku.

Lítið hefur farið fyrir Öldu Karen á Íslandi síðustu ár þar sem hún hefur verið búsett í New York með eiginkonu sinni, Katherine Lopez, en þær giftu sig 2023. Alda hefur rekið birtingastofu síðustu sjö ár og hefur síðustu mánuði unnið að kollagen-orkudrykknum Collagenx. 

Alda Karen kom fyrst fram á sjónarsviðið 2018 sem fyrirlesari og varð strax umdeild vegna yfirlýsinga sinna, sérstaklega um sjálfsást og það að kyssa peninga.