Val­gerður Hrund hættir hjá Sensa

Frá þessu er greint í tilkynningu frá félaginu. Þar kemur fram að hún muni þó ekki alfarið segja skilið við félagið, heldur taka sæti í stjórn Sensa. Guðmundur Stefán Björnsson, sem hefur gegnt stöðu öryggisstjóra og verið leiðtogi upplýsingatæknimála, tekur við framkvæmdastjórastöðunni 1. september 2025.

„Frá stofnun félagsins árið 2002 hefur Valgerður verið í lykilhlutverki í uppbyggingu og þróun fyrirtækisins. Undir hennar forystu hefur Sensa vaxið og dafnað, og er í dag 160 manna þjónustufyrirtæki, með starfsfólk í 12 löndum, sem sérhæfir sig í hýsingar- og rekstrarþjónustu, innviðalausnum og sérfræðiþjónustu fyrir fyrirtæki. Síminn keypti félagið árið 2007 og seldi það svo alþjóðlega upplýsingatæknifyrirtækinu Crayon, árið 2020, sem er eigandi þess í dag,“ segir í tilkynningunni. 

Guðmundur Stefán hefur verið stjórnandi hjá Sensa í tíu ár og var þar áður starfsmaður og stjórnandi hjá Símanum í átján ár, þar af fimm ár í framkvæmdastjórn. „Hann hefur gegnt lykilhlutverki innan félagsins allt frá því að upplýsingatæknisvið Símans sameinaðist Sensa. Guðmundur Stefán þekkir því fyrirtækið vel og er í kjörinni stöðu til að leiða það inn í næsta þróunarskeið.“

Haft er eftir Valgerði Hrund að þegar hún líti til baka á þessa 23 ára vegferð með Sensa þá fyllist hún stolti yfir því sem starfsmenn hafi skapað saman. „Það hefur verið ómetanlegt að vinna með frábæru teymi sem hefur sýnt ótrúlega elju og sköpunargleði. Nú er rétti tíminn til að afhenda keflið til Guðmundar Stefáns, sem ég treysti til að leiða fyrirtækið inn í næsta kafla með nýjum hugmyndum og krafti. Það krefst hugrekkis að takast á við ný hlutverk og breyta hlutunum - því það er svo mikilvægt í okkar bransa. Ég hlakka til að fylgjast með áframhaldandi vexti og árangri Sensa,“ segir Valgerður.

Samhliða framkvæmdastjóraskiptunum mun Steingrímur Óskarsson taka við sem öryggisstjóri Sensa. Steingrímur hefur starfað í tæknigeiranum í yfir 25 ár og sinnt bæði rekstri og ráðgjöf. Undanfarin ár hefur hann starfað innan Sensa við viðskiptaþróun og ráðgjöf til lykilviðskiptavina.