Tekið tíma að bera kennsl á illa farin lík

Árásirnar eiga sér stað á sama tíma og Donald Trump Bandaríkjaforseti heimsækir Mið-Austurlönd en hann hyggst ekki koma við í Ísrael. Höfðu margir bundið vonir við að heimsókn hans gæti leitt til viðræðna um vopnahlé eða liðkað fyrir endurreisn mannúðaraðstoðar á svæðinu. Ísrael hefur nú stöðvað matar- og lyfjasendingar til Gasa í á þriðja mánuð.

AP-fréttaveitan greinir frá þessu en kvikmyndatökumaður hennar í Khan Younis taldi 10 loftárásir á borgina síðustu nótt og fram á fimmtudag og sá fjölmörg lík flutt á líkhúsið á Nasser-sjúkrahúsinu. Sum þeirra voru illa leikin og tók því tíma að bera kennsl á þau. Alls höfðu 54 verið drepnir, samkvæmt upplýsingum frá líkhúsinu.

Meðal hinna látnu var blaðamaður sem starfaði fyrir katarska sjónvarpsstöðina Al Araby TV. Stöðin greindi frá því á samfélagsmiðlum að Hasan Samour hafi verið drepinn ásamt 11 fjölskyldumeðlimum sínum í einni af árásunum á Khan Younis.

Þetta var önnur nóttin í röð sem íbúar þurftu að þola miklar sprengjuárásum á borgina. Minnst 70 manns, þar af um tuttugu börn féllu í loftárásum á norður- og suðurhluta Gasa á miðvikudag, að sögn AP-fréttaveitunnar.

Þá féllu 13 manns í annarri árás á mosku og litla heilbrigðisstofnun í Jabaliya í norðurhluta Gasa, að sögn yfirvalda þar.

Vilja hernema Gasa og flytja fólk á brott

Benjamín Netanjahú, forsætisráðherra Ísraels, hefur heitið því að bæta enn frekar í hernaðaraðgerðir Ísraela á Gasa með það að markmiði að útrýma Hamas-samtökunum sem fara með yfirráð á svæðinu.

Alþjóðasamtök Mannréttindavaktarinnar hafa harðlega gagnrýnt fyrirætlanir Ísraels um að hernema Gasaströndina og flytja hundruð þúsund íbúa af svæðinu og hafa samtökin hvatt alþjóðasamfélagið til að mótmæla þeim.

Heilbrigðisyfirvöld á Gasa, sem starfa undir stjórn Hamas, sögðu á fimmtudagsmorgun að 82 lík höfðu verið flutt á sjúkrahús síðasta sólarhringinn í kjölfar árása Ísraelsmanna, þar á meðal 54 í Khan Younis. Alls hafi 53.010 Palestínumenn látist og 119.998 særst í árásum frá því að stríðið hófst í október 2023. Sömu yfirvöld segja að nærri 3.000 hafi verið drepnir frá því að Ísraelsher batt enda á vopnahlé þann 18. mars síðastliðinn.