Dregur úr tapi og not­endum fjölgar um 66 pró­sent

Þetta kemur fram í tilkynningu frá félaginu. Þar segir að áframhaldandi vöxtur og mikil tryggð viðskiptavina gefi tækifæri til að flýta innleiðingu á nýjungum og auknu lánaframboði. Ör tekjuvöxtur verði til þess að indó mun skila jafnvægi í rekstri mun fyrr en áætlað var og hraðar en aðrir áskorendabankar í Evrópu.

„Tap ársins 2024 nam tæpum 281 milljón króna en var tæplega 327 milljónir árið á undan. Efnahagsreikningur indó stækkaði hins vegar verulega á síðasta ári, eignir jukust úr 13,1 milljarði í 23,4 milljarða. Innlán viðskiptavina nær tvöfölduðust og voru tæpir 22 milljarðar í lok árs mv. 11,5 milljarða árið á undan. Þetta veitir indó mikilvægt svigrúm til að auka útlán jafnt og þétt í náinni framtíð,“ segir í tilkynningunni.

Innlán tæplega tvöfölduðust

Haft er eftir Tryggva Birni Davíðssyni, framkvæmdastjóra Indó, að félagið hafi haldið áfram að vaxa hraðar en björtustu vonir gerðu ráð fyrir. 

„Innlán tæplega tvöfölduðust á síðasta ári, sem gerir okkur kleift að auka framboð á útlánum hraðar og fyrr en við gerðum ráð fyrir. Það sem skiptir samt mestu máli er það hversu mörg líta á indó sem sinn aðalviðskiptabanka. Þetta sýnir að fólk treystir okkur og kann að meta þjónustuna sem við veitum. Þetta er mikilvægur grunnur að góðum rekstri.

Við ætlum að bjóða fleiri indóum einföld lán án bullgjalda og auka vöruframboðið jafnt og þétt til að svara hefðbundnum fjármálaþörfum fjölskyldna á Íslandi. Áskorendabankar sem við höfum horft til í öðrum löndum hafa yfirleitt þurft a.m.k. 7-10 ár til að ná jafnvægi í rekstri. Miðað við stöðuna nú mun það gerast mun fyrr hjá okkur en um leið erum við í kjörstöðu til að umbylta bankaþjónustu fyrir íslensk heimili. Indóar spöruðu 922 milljónir í bullgjöld á síðasta ári, Íslendingar gætu hins vegar samkvæmt okkar útreikningum sparað um 10 milljarða í óþörf gjöld og þóknanir á ári svo það er nóg svigrúm til að gera betur,” segir Tryggvi Björn.

Kortavelta jókst um 136 prósent

Í tilkynningunni segir að notkun á þjónustum indó sýni mikla fjölgun viðskiptavina sem nýti indó á degi hverjum.

„Kortavelta jókst um 136% á síðasta ári, sem er umtalsvert umfram fjölgun indóa. Viðskiptavinir greiddu samtímis tæplega 600.000 kröfur í indó appinu á síðasta ári.

Á þessu ári stendur til að auka jafnt og þétt vöruframboð til að mæta kröfum fleiri og ólíkra viðskiptavina. Á árinu hefur indó þegar kynnt m.a. dúett sem gerir pörum og öðrum kleift að hafa sameiginleg fjármál. Sjálfvirkar millifærslur, beingreiðslur og betri yfirsýn yfir útgjöld heimilisins er meðal nýjunga sem eru rétt handan við hornið.

Framundan er svo aukið aðgengi að útlánum og nýjum lánavörum sem munu jafnframt styrkja tekjugrunn indó. Þá stendur til að bjóða sameiginlegan sparnað fyrir pör og vini auk þess sem vöruframboð indó er í stöðugri þróun í öflugu samtali við viðskiptavini.

Markmið indó er að breyta bankakerfinu til hins betra svo meira verði eftir handa venjulegu fólki og minna fari til bankanna. 38% Íslendinga nefna nú indó sem fyrsta val í bankaþjónustu, fleiri en nefna nokkuð annað fjármálafyrirtæki. Viðtökurnar hafa því verið framar öllum væntingum,“ segir í tilkynningunni.