Á­tökin ná nýjum hæðum

Fregnir hafa borist af því að bæði ríki séu að safna hermönnum við landamærin. Hermenn skiptast á skotum með sprengjuvörpum, stórskotaliði og byssum á landamærum ríkjanna í Kasmír-héraði.

Pakistanar birtu meðfylgjandi myndband sem á að sýna eldflaugum skotið að Indlandi.

Eins og frægt er búa bæði ríkin yfir kjarnorkuvopnum og er óttast að nýtt stríð, það fjórða milli ríkjanna, gæti verið í uppsiglingu. Í frétt Guardian segir að ríkin hafi ekki verið nærri stríði í áratugi.

Mikil spenna hefur verið milli ríkjanna í rúmar tvær vikur, og í raun alla tíð frá stofnun Pakistan fyrir tæpum átta áratugum. Núverandi spenna myndaðist eftir mannskæða árás hryðjuverkamanna Indlandsmegin í Kasmírhéraði. Ráðamenn í Indlandi hafa lengi sakað yfirvöld í Pakistan um að standa við bakið á hryðjuverkahópum í Kasmír.

Á miðvikudagskvöldið skutu Indverjar svo eldflaugum á að minnsta kosti níu skotmörk Pakistanmegin í Kasmír og í sjálfu Pakistan. Ráðamenn í Pakistan hétu því að svara fyrir sig og virðist sem þeir hafi gert það í gærkvöldi.

Marco Rubio, utanríkisráðherra Bandaríkjanna, hringdi í ráðamenn beggja vegna við landamærin í nótt og bauð aðstoð Bandaríkjanna við að draga úr spennu á svæðinu og hefja viðræður. Utanríkisráðherra Pakistan segist hafa gert Rubio ljóst að boltinn væri nú hjá Indverjum og það væri þeirra að draga úr spennunni.

Utanríkisráðherra Indlands slær á svipaða strengi og segir að Indverjar muni áfram sýna stillingu og ábyrgð.

Í meðfylgjandi myndbandi má heyra skothríð og sprengingar í Peshawar í Pakistan. Embættismenn segja að dróna hafi verið grandað yfir borginni.

Áratugadeilur og átök

Tvö af þremur stríðum Indlands og Pakistan hafa verið háð um Kasmír-hérað en það hafa ríkin lengi deilt um. Bæði ríki gera tilkall til alls héraðsins, en stjórna hvort sínum hluta þess. Indverjar stjórna um 55 prósentum Kasmír, í flatarmáli talið og Pakistanar um þrjátíu prósentum.

Kínverjar, sem styðja Pakistan, stjórna svo um fimmtán prósentum héraðsins. Kínverskir hermenn tóku hluta þess í stríði við Indland árið 1962 en þeir höfðu í raun haft stjórn á honum um nokkuð skeið fyrir það.

Á undanförnum árum hefur komið til blóðugra átaka milli kínverskra og indverskra hermanna á svæðinu. Þeir hafa þó barist sín í milli með bareflum og steinum í stað skotvopna og sprengja.

Indverjar eru á blaði töluvert öflugri en Pakistanar, þegar kemur að hernaði. Her Indlands er skipaður tæpri einni og hálfri milljón manna en um 660 þúsund menn eru í her Pakistan. Þá verja Indverjar um 74,4 milljörðum dala í varnarmál en Pakistanar eingöngu 8,4 milljörðum.

Áætlað er að Indverjar eigi um 180 kjarnorkuvopn en Pakistanar 170.

Frá 2019, þegar síðast kom til átaka milli ríkjanna, hafa heraflar bæði Indlands og Pakistans styrkst töluvert. Bæði ríkin hafa keypt mikið magn hergagna á undanförnum árum. Indverjar hafa keypt frá Bandaríkjunum og öðrum Vesturlöndum en Pakistanar hafa fengið töluvert magn hergagna frá Kína.