Sam­þykktu Suðureyjargöng og hækkun eftirlaunaaldurs

Síðdegis hafði Lögþingið samþykkt frumvarp stjórnarinnar um hækkun eftirlaunaaldurs í áföngum upp í 69 ár. Eftirlaunafrumvarpið náði naumlega í gegn með minnsta mögulega mun, 16 atkvæðum gegn 15, en frumvarpið mætti harðri andstöðu innan launþegahreyfingarinnar.

Þótt forystumenn stjórnarflokkanna þriggja hafi ekki viljað viðurkenna það opinberlega var vitað að samþykkt Suðureyjarganga var háð því að eftirlaunafrumvarpið hlyti jafnframt brautargengi. Framsókn, flokkur fjármálaráðherrans Ruth Vang, hafði skilyrt stuðning sinn við Suðureyjargöngin því að eftirlaunafrumvarpið fengist samþykkt og hékk stjórnarsamstarfið raunar á bláþræði vegna málsins.

Lögþingið hafði áður samþykkt árið 2018 að 67 ára eftirlaunaaldur skyldi frá 1. júlí 2024 hækka um hálft ár og aftur um hálft ár frá 1. júli 2030, sem þýðir að frá árinu 2030 verður eftirlaunaldur í Færeyjum kominn í 68 ár. Með samþykkt lagafrumvarpsins núna hækkar eftirlaunaldur upp í 68,5 ár árið 2035 og upp í 69 ár árið 2038.

Miklar deilur voru einnig um vegtengingu Suðureyjarganga við Sandey og veglínu þvert yfir Sandey til að tengja gangamunna fyrirhugaðra Suðureyjarganga við gangamunna Sandeyjarganga, sem voru opnuð fyrir tveimur árum. Sandeyingar sögðu veginn kljúfa eyjuna í tvennt, mikið ónæði myndi skapast af umferðinni. Einnig sameinuðust hin ýmsu samtök í andstöðunni sem töldu dýrmætu landi fórnað undir veginn.

Í meðförum þingsins var að nokkru leyti komið til móts við þessi sjónarmið með því að veglína, sem átti að liggja vestan Sandavatns, var færð austur fyrir vatnið og hluti vegarins settur í jarðgöng um Traðarhamar.

Í frétt Sýnar fyrir fjórum mánuðum var fjallað um þetta risaverkefni.

Samþykkt frumvarpsins í kvöld felur í sér að stysta veglína jarðganga var valin. Hún þýðir að Suðureyjargöng verða 22,8 kílómetra löng milli Sandeyjar og Suðureyjar. Auk þess verður lagður 1.550 metra langur afleggjari til að tengja Skúfey við göngin. Heildarlengd jarðganga verður þannig um 24,4 kílómetrar.

Mesta dýpi verður 180 metrar og mesti veghalli 5 prósent, en þó 10 prósent að Skúfey. Göngin verða boðin út með bæði 10,5 metra breidd og 9,5 metra breidd en afleggjarinn að Skúfey með 8,5 metra breidd.

Heildarkostnaður við jarðgöngin er áætlaður 4.125 milljónir danskra króna, en með vegagerð og jarðgöngum á landi um Traðarhamar alls 4.875 milljónir danskra króna, eða sem nemur um 95 milljörðum íslenskra króna.

Áætlað er að útboðs- og samningsferli geti tekið tvö ár og verkhönnun og framkvæmdir átta ár. Suðureyjargöng gætu þannig verið tilbúin eftir áratug.