„Jæja Heimir, þú verður að hjálpa mér að enda þetta vel“

Brot úr þáttunum má sjá hér að neðan en þáttaröðina í heild er hægt að finna á Stöð 2+.

„Í raun höfðu öll mín ár hjá FH verið bara nokkrir leikir og ekkert sérstakt,“ sagði Bjarki sem eftir ár sín í atvinnumennsku, og með ÍA og KR, lauk ferlinum með FH og var þar algjör lykilmaður þegar liðið varð Íslandsmeistari árið 2012. Það sumar lék hann nánast alla leiki, eftir að hafa fundað með Heimi um veturinn:

„Hann sagði við mig: Jæja Heimir, þú verður að hjálpa mér að enda þetta vel. Ég sagði já. „Á ég ekki bara að taka eitt alvöru undirbúningstímabil?“ Ég sagði bara: Jú Bjarki, það væri frábært,“ lýsti Heimir samskiptum þeirra glettinn.

„Þegar undirbúningstímabilið hófst þá var ég bara með strax frá byrjun. Allar æfingar. Enginn afsláttur,“ sagði Bjarki og bætti við: „Það þýddi að þetta var fjögurra tíma ferli á hverjum degi. Þá var þessi blessaða „rúlla“ komin fram á sjónarsviðið. Kaldi potturinn og alls konar hreyfiteygjur sem maður hafði aldrei spáð í.“

„Hann mætti á svæðið hundrað prósent fókuseraður. Fyrstur inn og síðastur út. Æfði alveg svakalega vel,“ sagði Heimir.

„Ég ætlaði að enda þennan feril, sem mér fannst ekkert sérstakur, þannig að manns yrði ekki bara minnst sem leikmanns sem var alltaf meiddur,“ sagði Bjarki.