Kennarar fagna því að flétta eigi kynjafræði inn í allar greinar

Þetta má sjá í umsögn KÍ sem Magnús Þór Jónsson, formaður Kennarasambands Íslands og Sigrún Birna Björnsdóttir Kaaber sérfræðingur í vinnuumhverfis- og jafnréttismálum skrifa undir. 

Hér geisi faraldur kynbundis ofbeldis

„KÍ leggur sem fyrr áherslu á að í skólakerfinu leynist sóknarfæri því þar má vekja jafnréttisnæmi flestra þegna samfélagsins. KÍ leggur jafnframt áherslu á að mennta þurfi kennara til jafnréttiskennslu og bjóða þeim viðeigandi starfsþróun því mikilvægt er að allir kennarar hafi fyrrgreint jafnréttisnæmi svo virkja megi grunnþáttinn jafnrétti í öllu skólastarfi á öllum skólastigum,“ segir meðal annars í umsögn KÍ.

Þá er vakin athygli á því að 2025 sér sérstakt Kvennaár og yfir 50 samtök launafólks; kvenna, hinsegin fólks og fatlaðs hafi tekið höndum saman og lagt fram kröfur til stjórnvalda um hvernig stuðla megi að auknu jafnrétti. „Þrátt fyrir að Ísland hafi náð töluverðum árangri í jafnréttismálum á síðustu áratugum er enn langt í land þar til fullu jafnrétti er náð.“

„Hér geisar faraldur kynbundins ofbeldis og hefur KÍ orðið áþreifanlega vart við áhrif þessa faraldurs meðal síns félagsfólks,“ segir meðal annars í umsögninni.

Vilja fá jafnréttisfulltrúa í alla skóla

KÍ fagnar því að horft sér sérstaklega til framhaldsskóla í þessu sambandi en bendir á að ef flétta á kynja- og jafnréttisfræði inn í alla kennslu og starfsemi skóla verður efnið að vera hluti kennaranáms, starfsþróunar og alls þess náms sem starfsfólki í framhaldsskólum stendur til boða. Er lagt til að mikilvægt sé að í hverjum framhaldsskóla sé skilgreint stöðuhlutfall sérstaks jafnréttisfulltrúa.

„Verkefni jafnréttisfulltrúa ættu að hverfast um það starf sem unnið er í skólanum og félagslíf nemenda. Jafnréttisfulltrúi ætti að vera formaður jafnréttisnefndar sem fengi þá það hlutverk að auka þekkingu starfsfólks og nemenda í málum er varða einelti, kynferðislega og kynbundna áreitni og ofbeldi innan hvers framhaldsskóla.“

Hallar verulega á karlmenn í áætluninni

Athygli vekur að af 19 erindum sendum Alþingi vegna tillögunnar eru karlar einungis nefndir i 3 erindum.  Og einungis í erindi Ingimundar Stefánssonar er bent á kynjamismunun sem birtist í áætluninni.

Meðal þeirra athugasemda sem Ingimundur gerir, en honum þykir halla allverulega á karlmenn í bæði áætluninni sem og þeim umsögnum sem kallað hefur verið eftir, er að „ekki sé stefnt að aðgerðum til að fjölga körlum í störfum hjá ríki og ráðuneytum, eða í sveitarstjórnum þar sem þeir hafa verið mun færri, en á sama tíma stefnt að aðgerðum til að fjölga konum í efstu lögum fyrirtækja.“

Ingimundur segir að um mismunun sé að ræða, til að mynda liggi fyrir að karlmenn þurfi oft að sæta heimilsofbeldi, það sýni erlendar rannsóknir. En Ingimundur virðist einn um að benda á þetta, ef marka má umsagnirnar, og sker hann sig því nokkuð úr þeim fögnuði sem annars ríkir með tillöguna.