Ó­reiðan ræður ríkjum í Pentagon

Hegseth hefur verið gagnrýndur fyrir að segja frá yfirvofandi loftárásum á samskiptaforritinu Signal, bæði í hópi háttsettra embættismanna, og eins blaðamanns, og í persónulegum hópi sem innihélt meðal annars eiginkonu hans og bróður.

Þá hefur hann rekið þó nokkra af sínum helstu ráðgjöfum í ráðuneytinu á undanförnum dögum og sakað þá um að leka upplýsingum í blaðamenn.

Umkringdi sig vinum

Þegar Hegseth settist fyrst að í ráðuneytinu stefndu æðstu starfsmenn þess að því að umkringja hann reyndu fólki til að hjálpa honum að reka það stærðarinnar bákn sem varnarmálaráðuneyti Bandaríkjanna er, samkvæmt frétt Politico. Ráðuneytið er í raun stærsta stofnun Bandaríkjanna.

Þess í stað umkringdi hann sig nánum ráðgjöfum sem einnig voru uppgjafahermenn, eins og Hegseth, og höfðu einnig litla reynslu af rekstri bákns í anda ráðuneytisins, eins og Hegseth. Þessi hópur hefur síðan þá einkennst af illdeilum og óreiðu.

Í síðustu viku voru þrír úr þessum hópi reknir og þeim vísað úr byggingunni, eftir að Hegseth sakaði þá um að leka upplýsingum til fjölmiðla. Hegseth er sagður hafa grunað að mennirnir væru að veita fjölmiðlum upplýsingar til að sverta aðra í hópnum.

Sá fjórði, sem hafði verið helsti talsmaður ráðherrans, hætti í kjölfarið og sakaði Hegseth um vanhæfi og skort á hollustu í grein sem hann skrifaði á vef Politico.

Í þeirri grein talaði Ullyot um „mánuð frá helvíti“ í ráðuneytinu og sagði meðal annars að Trump ætti skilið að hafa betri varnarmálaráðherra en Hegseth.

„Óreiðan ræður ríkjum undir stjórn Hegseth.“

Hægagangur í Pentagon

Óreiðan í ráðuneytinu er sögð hafa komið verulega niður á störfum starfsmanna þess og við það hefur bæst krafa DOGE, niðurskurðarstofnunar Elons Musk, um að um tvö hundruð þúsund borgaralegum starfsmönnum ráðuneytisins, af um 750 þúsund, verði sagt upp.

Hegseth hefur, samkvæmt New York Times, varað við því að þessar uppsagnir myndu lama starfsemi ráðuneytisins.

Fjölmiðlar ytra segja starfsemi ráðuneytins þegar hafa orðið fyrir skaða. Ákvarðanataka sé hæg, fundir gangi illa og illdeilur aukist.

Nánustu samstarfsmenn Hegseths eru sagðir hafa farið í gegnum samfélagsmiðla annarra starfsmanna í leit að neikvæðum ummælum um Donald Trump. Þrír heimildarmenn NYT sögðust hafa verið krafnir um ferilskrár svo þær gætu sannað „föðurlandsást“ sína. Allir þrír höfðu tekið þátt í bardögum í Afganistan.

Segir fjölmiðla í herferð gegn sér

Þrátt fyrir alla óreiðuna hefur Trump lýst yfir stuðningi við Hegseth og Karoline Leavitt, talskona Hvíta hússins, sagði í viðtali við Fox News að þetta ástand hefði myndast vegna þess að Hegseth væri umkringdur fólki sem reyndi koma í veg fyrir þær umfangsmiklu breytingar sem hann ætlaði að framkvæma.

Hegseth sjálfur hefur sakað fjölmiðla og áðurnefnda fyrrverandi samstarfsfélaga sína um áróðursherferð gegn sér.

Þrátt fyrir stuðningsyfirlýsingar frá Hvíta húsinu eru vísbendingar um að þolinmæði þingmanna í garð Hegseths fari dvínandi. Ráðherrann er til rannsókn vegna samskipta hans og annarra háttsettra embættismanna á Signal en sú rannsókn hófst áður en í ljós kom að hann átti einnig samskiptum um árásirnar á Húta í öðrum hópi með óbreyttum borgurum.

Sú rannsókn var sett á laggirnar eftir að Repúblikanar í öldungadeild Bandaríkjaþings lögðu slíkt til. Eftir að seinni spjallhópurinn leit dagsins ljós hefur einn þingmaður Repúblikanaflokksins sagt opinberlega að Trump ætti að reka Hegseth.

Sá er Don Bacon, fyrrverandi herforingi í flugher Bandaríkjanna, en hann hefur sagt að samskipti Hegseths á Signal séu óásættanleg.