„Vinnur ekki leiki ef þú skorar ekki“

Amorim gerði nokkrar breytingar á liði sínu frá 5-4 ævintýrinu gegn Lyon í vikunni. Hann setti þó lykilmenn á borð við Bruno Fernandes og Diogo Dalot inn þegar staðan var enn jöfn. Það dugði þó ekki til þar sem Úlfarnir skoruðu eina mark leiksins.

„Við þurfum að skora mörk. Það var tími þar sem við skoruðum ekki né sköpuðum færi. Við fengum fullt af færum til að skora en við skoruðum ekki, það er okkar helsta vandamál. Við fengum á okkur mark úr eina skoti þeirra á markið. Þeir skora eitt mark og við töpum leiknum.“

„Við þurfum að halda áfram vinnunni, það var ekki bara Rasmus Höjlund heldur allt liðið sem klúðraði færum í dag,“ sagði þjálfarinn aðspurður hvort danski framherjinn þyrfti meiri aðstoð.

„Þetta tímabil mun enda svona svo við þurfum að taka það jákvæða með okkur og vinna í því sem við getum bætt. Þeir fá eitt tækifæri. Við þurfum að skoða allt, leikmannahópinn og hvað við viljum gera á leikmannamarkaðnum. Við munum sjá til. Við tölum saman alla daga, um næsta tímabil og hvernig með tímanum munum við geta bætt liðið.“

„Þeir (Tyler Fredricson og Harry Amass) spiluðu virkilega vel. Við þurfum að skora svo ungu leikmennirnir fái betri upplifun. Þessir dagar eru virkilega niðurdrepandi. Við vorum betri en andstæðingurinn en þú vinnur ekki leiki ef þú skorar ekki.“

Eftir tap dagsins eru Rauðu djöflarnir og Úlfarnir í 14. og 15. sæti, bæði lið með 38 stig. Man United hefur hins vegar farið fjóra leiki án sigurs í deildinni á meðan Úlfarnir hafa unnið fimm í röð.