Segir stjórn sósíal­ista ræða „pólitískar hreinsanir“ fyrir flokks­þing

Hatrammar deilur hafa geisað innan Sósíalistaflokksins undanfarnar vikur. Karl Héðinn Kristjánsson, formaður ungliðahreyfingar flokksins, og Trausti Breiðfjörð Magnússon, fyrrverandi borgarfulltrúi flokksins, hafa gagnrýnt ofríki Gunnars Smára en formaður framkvæmdastjórnarinnar hefur svarað allri gagnrýni af mikilli hörku.

Nú fullyrðir Trausti að framkvæmdastjórn Sósíalistaflokksins hafi rætt það af alvöru að henda fólki sem „ali á óeiningu“ úr flokknum. Í aðsendri grein á Vísi skrifar Trausti að til þess gæti stjórnin virkjað Samvisku, nefnd sem á meðal annars að skera úr ágreiningsmálum sem koma upp innan flokksins.

Samviska getur meðal annars veitt almennum félagsmönnum í Sósíalistaflokknum skriflegar áminningar eða vikið þeim úr flokknum, að því er segir á vefsíðu flokksins. Trausti skrifar að þrátt fyrir að Samviska hafi aldrei verið virk frá stofnun Sósíalistaflokksins hafi framkvæmdastjórnin ákveðið að slembivelja fólk til þess að sitja í nefndinni fyrir tveimur vikum.

„Tíminn kann þó að vera of naumur til þess að hægt sé að gera slíkt fyrir aðalfund. En þetta er leið sem augljóslega hugnast formanninum. Pólitískar hreinsanir,“ skrifar fyrrverandi borgarfulltrúinn og vísar til sósíalistaþings sem er jafnframt vettvangur aðalfundar Sósíalistaflokksins sem halda á í maí.

Vill nýja forystu en býður sig ekki fram sjálfur

Gagnrýnir Trausti að fólki sem hafi upplifað einelti eða slæma framkomu af hálfu Gunnars Smára hafi verið vísað á að beina kvörtunum til Samviskunnar. Margir hafi viljað gera það en nefndin hafi hins vegar aldrei tekið við erindum frá því að flokkurinn var stofnaður.

„En nú þegar formaðurinn vill að mál séu leyst, þá er ekkert mál að virkja Samviskuna. Slembivelja á fólk í þessa nefnd og sá sem sér um það verður Gunnar Smári og hans stjórn. Ekki beint traustvekjandi,“ skrifar Trausti.

Hvetur Trausti félaga sína til þess að fjölmenna á sósíalistaþingið í maí. Vonast hann til þess að hægt verði að kjósa fólk sem vill breytingar á skipulagi og menningu flokksins til forystu. Hann ætli þó ekki að bjóða sig fram þar.

Lýsir gagnrýnendum sem hræætum og takmarkar tjáningu félagsmanna

Deilur sósíalista urðu opinberar þegar Karl Héðinn, formaður ungliðahreyfingar þeirra, sagði sig úr kosningastjórn til þess að mótmæla því sem hann kallað „ofríki, andlegt ofbeldi og trúnaðarbrot“ Gunnars Smára. formanns framkvæmdastjórnar flokksins í síðasta mánuði.

Í kjölfarið steig Trausti fram og sagðist hafa hrökklast úr embætti að hluta til vegna þess að forysta flokksins hefði ráðskast með hann. Gunnar Smári hefði þannig reynt að handstýra því sem hann og Sanna Magdalena Mörtudóttir, hinn borgarfulltrúi flokksins, gerðu. Hann hefði auk þess greitt tíunda hluta mánaðarlauna sinna sem borgarfulltrúi til félags á vegum flokksins án þess að fá nokkrar þakkir fyrir.

Gunnar Smári hefur svarað öllum gagnrýnisröddum af hörku, meðal annars í sjónvarpsþætti sínum á Samstöðinni sem hann á. Hann hefur lýst Karli Héðni sem „loddara“ og sakað hann um undirróður. Vísaði hann til Karls Héðins og Trausta sem „gjammandi hýenuhvolpa“ og „ungherra“ sem væru viðkvæmir því þeir hefðu verið „særðir af einelti“ í uppeldi.

Formenn stjórna Sósíalistaflokksins hafa fylkt sér að baki formanninum.

Framkvæmdastjórn flokksins hefur meðal annars reynt að bæla niður gagnrýnisraddir með því að takmarka hversu oft félagsmenn geta tjáð sig á umræðuvettvangi flokksins á Facebook. Frá því um helgina geta félagsmenn aðeins sett inn eina færslu í hópinn á viku og aðeins skrifað eina athugasemd við færslur á klukkustund.