Færri á­nægðir með Trump og efna­hags­málin

Trump er af mörgum talinn hafa tryggt sér forsetaembættið á grunni efnahagsstjórnunar en meint slæm staða bandaríska efnahagslífsins var lengi baggi á Joe Biden og í kjölfarið Kamölu Harris. Þegar verst var sögðu einungis þrír af hverjum tíu að Biden stæði sig vel á því sviði.

Nú segja fjórir af tíu kjósendum að Trump standi sig vel í efnahagsmálum.

Þetta er meðal þess sem kemur fram í niðurstöðum könnunar sem AP fréttaveitan og NORC gerðu.

Heilt yfir er rétt rúmur meirihluti kjósenda í Bandaríkjunum þeirrar skoðunar að Trump standi sig ekki vel í starfi. Um fjórir af tíu segja hann standa sig vel. Þá segir í grein AP um könnunina að þeir sem sjá Trump í neikvæðu ljósi hafi sterkari skoðanir en þeir sem sjá hann í jákvæðu ljósi.

Fjórir af tíu segja til að mynda að hann standi sig mjög illa í starfi en einungis tveir af tíu segja hann standa sig mjög vel.

Repúblikanar og Demókratar sammála

Best virðist Trump standa sig, í augum kjósenda, þegar kemur að málefnum innflytjenda. Þar segja 49 prósent að hann standi sig vel en fimmtíu segja hann standa sig illa. Fleiri segja hann standa sig vel þar en segja hann standa sig vel heilt yfir og nær það bæði yfir kjósendur sem styðja Repúblikanaflokkinn og þá sem styðja Demókrataflokkinn.

Níu af tíu stuðningsmönnum Repúblikanaflokksins segja Trump standa sig vel þegar kemur að málefnum innflytjenda en sjö af tíu segja hann standa sig vel þegar kemur að milliríkjaviðskiptum, tollum og slíku.

Þegar kemur að tollum hefur Trump gengið hart fram en í senn verið mjög óútreiknanlegur. Framganga hans í garð Mexíkó, Kanada og annarra ríkja sem hann hefur annað hvort beitt tollum eða sagst ætla að beita tollum hefur valdið taugatitringi víða um heim og þá sérstaklega á mörkuðum.

Trump fékk ítrekað góðar einkunnir hjá kjósendum fyrir efnahagsstjórn hans á fyrra kjörtímabili hans. Fleiri kjósendur voru ítrekað sáttir við störf hans á því sviði en voru sáttir við hann á öðrum sviðum.

Kannanir sem framkvæmdar voru fyrir og eftir forsetakosningarnar í fyrra benda til þess að hagvöxtur og verðlag spilaði stóra rullu í því að kjósendur ákváðu að kjósa hann aftur í embætti. Kjósendur sem sögðu stöðu hagkerfisins mikilvægasta málefni Bandaríkjanna veittu honum atkvæði í mun meira mæli en aðrir kjósendur.

Veðja á að verðið skipti ekki öllu máli

Fari verðlag hækkandi í Bandaríkjunum á næstu mánuðum, eftir að hafa hækkað töluvert á undanförnum árum, samhliða umfangsmiklum tollum og mögulegs viðskiptastríðs Trumps við heiminn allan, gæti það haft mikil áhrif á almenning í Bandaríkjunum.

Sérfræðingar búast fastlega við því að verðlag muni hækka beiti Trump umfangsmiklum tollum á ríki heims. Ráðgjafar og bandamenn Trumps hafa á undanförnum vikum ítrekað sagt að svo geti vel farið.

Trump-liðar virðast ætla að veðja á það að kjósendur muni þó sætta sig við það til að bæta innlenda framleiðslu, eins og fram kemur í grein New York Times.

Scott Bessent, fjármálaráðherra, ítrekaði þetta fyrr í mars þegar hann sagði að aðgengi að ódýrum vörum væri ekki kjarni ameríska draumsins. Þess í stað væri ameríski draumurinn það að hafa góð störf og nægjanlega há laun til að hafa efni á heimili.