Rif eftir Önnu Júlíu sigraði og verður á Héðinsreit

Oddur Ævar Gunnarsson skrifar 10. mars 2025 12:54

Vinningstillagan í samkeppni um útilistaverk í Vesturvin á Héðinsreit í Vesturbæ Reykjavík er verkið Rif eftir Önnu Júlíu Friðbjörnsdóttur. Þetta kemur fram í tilkynningu frá Listasafni Reykjavíkur.

Þar segir að listasafnið hafi haft umsjón með samkeppninni sem fram hafi farið eftir samkeppnisreglum Sambands íslenskra myndlistarmanna (SÍM) en um var að ræða lokaða keppni með opnu forvali. Reykjavíkurborg og lóðarhafar sameinuðust um listsköpun á svæðinu til að auka gæði og gott umhverfi í borginni og var myndlistarmönnum síðasta haust boðið að taka þátt í forvalinu.

Forvalsnefnd sem skipuð var fulltrúum lóðarhafa – Festir ehf, Listasafns Reykjavíkur og SÍM, valdi þrjá myndlistarmenn úr innsendum umsóknum til þátttöku í seinni hluta samkeppninnar. Anna Júlía Friðbjörnsdóttir, Elín Hansdóttir og Finnur Arnar Arnarson voru valin til þess að vinna tillögur að verki. Við val á listaverki skal metið á hvern hátt verkið auðgar mannlíf í Vesturvin, fegrar eða virkjar vannýtt svæði og skapar spennandi umhverfi.

Niðurstaða dómnefndar liggur nú fyrir og hefur hún valið verk Önnu Júlíu Friðbjörnsdóttur sem vinningstillöguna eins og áður segir. Framkvæmdir við uppsetningu verksins Rif í Vesturvin hefjast vorið 2025.

Anna Júlía Friðbjörnsdóttir (f. 1973) býr og starfar í Reykjavík. Hún vinnur í ýmsa miðla í verkum sem taka mið af samtíma og sögulegum málefnum. Verk hennar eru tilraunakennd, einkum í formi skúlptúra og innsetninga þar sem umbreyting efna, kerfa og miðlunar eru skoðuð með fjölbreyttum hætti.

Í umsögn dómnefndar segir:

„Listaverk Önnu Júlíu Friðbjörnsdóttur, Rif, er skúlptúr sem stendur á hringlaga undirstöðu, bronsafsteypa af rifbeini hvals á steyptri terrazzo skífu. Verkið er einnig gagnvirkur áttaviti þar sem höfuðáttirnar eru inngreyptar í skífuna og beininu má snúa þar sem það er fest á snúningslegu. Verkið tekur þannig mið af umhverfi sínu með vísunum í lífríki hafsins, siglingafræði og skipasmíði. Verkið er jafnframt þátttökuverk þar sem gestir og gangandi í inngarðinum í Vesturvin geta snúið beininu og leikið sér með verkið.

Gæði verksins felast í einfaldleika þess en jafnframt djúpum vísunum til umhverfisins og náttúrunnar. Hvalbeinið sem unnið er með er úr Íslandssléttbak sem er tegund í útrýmingarhættu. Verkið verður sýnilegt öllum sem eiga leið um garðinn, sem er almenningsrými, og getur vakið áhorfendur til umhugsunar og orðið kennileiti og áhugavert uppbrot í umhverfinu í Vesturvin. Litir terrazzo undirstöðunnar munu jafnframt setja svip á svæðið og vera svipmiklir úr íbúðunum í kring. Verkið er jafnframt einkennandi fyrir feril Önnu Júlíu og áhugaverður liður í þróun og framvindu hennar listsköpunar.“

Menning Reykjavík Styttur og útilistaverk