Sjáðu frá­bæran skalla Benonýs Breka

Þrátt fyrir að eiga eftir að fá sitt fyrsta tækifæri í byrjunarliði Stockport County þá hefur Benoný Breki núna skorað þrjú mörk fyrir liðið, á aðeins samtals 87 mínútum. Það gerir að meðaltali mark á hálftíma fresti.

Skallamark Benonýs í gær var af frekar löngu færi en það má sjá hér að neðan (markið kemur eftir 1:05 mínútu af myndbandinu).

Markið skoraði Benoný á 78. mínútu, eftir að hafa verið inni á vellinum í átta mínútur, og Stockport fékk svo fín færi til að tryggja sér sigur í leiknum en tókst ekki að nýta þau.

Um helgina kom Benoný inn á í upphafi seinni hálfleiks og skoraði bæði mörkin í 2-1 sigri gegn Blackpool.

Hans fyrsti deildarleikur, eftir komuna frá KR í vetur og markametið á Íslandi í fyrra, var gegn Barnsley 8. febrúar þar sem hann spilaði 22 mínútur.

Frammistaða Benonýs síðustu daga gæti hafa vakið athygli Arnars Gunnlaugssonar sem brátt velur sinn fyrsta landsliðshóp, fyrir komandi leiki við Kósovó í umspili Þjóðadeildarinnar. Benoný á að baki 18 leiki fyrir yngri landslið Íslands og hefur skorað í þeim fjögur mörk.

Stockport er í 4. sæti D-deildrainnar með 61 stig, fjórum stigum á eftir Wrexham og sex stigum á eftir Wycombe sem bæði eiga leik til góða. Birmingham er langefst með 76 stig og tvo leiki til góða á Stockport. Tvö efstu liðin komast beint upp í B-deildina en liðin í 3.-6. sæti fara í umspil um síðasta lausa sætið.