Fjórar týpur af yfir­mönnum: Hver er þín týpa?

Til dæmis ef fólk upplifir að þegar það er að opna umræðu fyrir nýjum tillögum eða lausnum, þá nánast þaggi yfirmaðurinn niður í viðkomandi áður en hann/hún nær að klára eða skýra út sitt mál.

En auðvitað er búið að rannsaka þetta eins og allt annað. Þar sem niðurstöður sýna að það hvernig yfirmaður ber sig í samskiptum eða nálgun við starfsfólk, segir eiginlega allt um það hvers konar yfirmaður viðkomandi er.

Í dag og á morgun rýnir Atvinnulífið í fjórar týpur stjórnenda og hvernig starfsfólk getur eflt sjálft sig í að vinna með þeim sem helst á við á þeirra vinnustað.

Týpurnar fjórar: Hver er þín týpa?

Týpurnar fjórar sem koma fram hér að neðan eru þær skilgreiningar sem finna má í bókinni: Managing Up: How to Get What You Need from the People in Charge by Melody Wilding og kom út núna í vikunni.

Týpunar eru eftirfarandi:

1. Yfirboðarinn (e. The Commander)

Þessi stjórnandi er ofur-duglegur. Reyndar svo duglegur að oft er viðkomandi búinn að klára verkefni áður en annað fólk yfir höfuð veit af þeim. Þetta er yfirmaðurinn sem hugsar meira út frá því hvað þarf að gera frekar en hvað fólki finnst um það.

Þótt titillinn hljómi nokkuð kaldranalegur er þó ekki þar með sagt að viðkomandi yfirmaður sé ekki hlýr og góður gagnvart starfsfólki sínu. Því er öðru nær en þó á viðkomandi það til að vanrækja þörf starfsfólks á andlegum stuðningi. Þessi yfirmaður er hins vegar mjög skýr í því hvaða markmiðum þarf að ná og þar liggur áherslan frekar en hitt.

2. Klappstýran (e. The Cheerleader)

Hérna erum við með yfirmann sem er mjög orkumikill, bjartsýnn og áhugasamur. Eins og yfirboðarinn, stefnir klappstýru-stjórnandinn hátt og vill að hlutirnir gerist hratt. Hins vegar elskar þessi týpa að byggja upp gott samband við sitt fólk og að tengja saman fólk, verkefni og svo framvegis.

Klappstýru-stjórnandinn horfir mikið til þess að teymis-andinn sé jákvæður og skemmtilegur. Jafnvel svo mikið að sumum finnist um of hversu mikið pepp er gefið í hópinn í stað þess að veita hverjum og einum smá endurgjöf.

3. Umönnunaraðilinn (The Caretaker)

Hér erum við að tala um týpuna sem gefur fólki góðan tíma; er góður hlustandi og passar alltaf upp á að hver einasti starfsmaður í hópnum finni til sín. Því allir skipti máli. Þótt þessi týpa stjórnenda sé mjög félagslynd eru þeir rólegri að eðlisfari en klappstýran og gefa því öðruvísi af sér.

Fyrst og fremst vill þessi týpa stjórnenda að starfsfólkinu þeirra líði vel og upplifi sig örugg á góðum vinnustað. Fyrir vikið getur það gerst að sumir upplifi þennan stjórnanda ekki nógu ákveðinn og stundum ganga hlutirnir seinna fyrir sig hjá þessum týpum í samanburði við yfirboðarann eða klappstýruna.

4. Regluvörðurinn (The Controller)

Þessi týpa er oft hlédræg og alvarleg í fasi. Þetta er yfirmaðurinn sem treystir á gögn, vill taka upplýstar ákvarðanir og vinna jafnvel á bakvið tjöldin að því að hlutirnir gangi sem best upp.

Þetta er samt ekki félagslyndi stjórnandinn og þessi týpa er ekki mikið að velta fyrir sér hlutum eins og tengslanetinu. Margir upplifa þessa týpu sem íhaldssaman stjórnanda, sem er ekki líklegur til að stökkva til og breyta hlutunum þótt nýjar hugmyndir vakni.

Á morgun fáum við nokkur góð ráð fyrir fólk sem vill efla sig í að vinna með sínum yfirmanni miðað við týpurnar hér að ofan.