Eðli­legt að fólk vinni minna mánu­dag eftir kosningar

Á ensku er talað um ákveðið recovery state í kjölfar mikillar spennu. Því það er eitt af því sem gerist fyrir kosningar; samfélagið í heild sinni fer á ákveðið spennustig. Ef við leyfum okkur að þýða recovery state sem hálfgert spennufall, þýðir það að í spennufalli er heilinn okkar þreyttur, einbeitingin minni og afköstin okkar tímabundið minni.

Sett í samhengi við daginn í dag má gera ráð fyrir að ef fólk er að upplifa einhverja leti í vinnunni í dag, þá er þetta ekki leti í raun. Heldur spennufall og eðlilegt framhald af því að kosningarnar voru að klárast um helgina. Um svona spennufall má lesa meira um í fínum pistli Harvard Business Review, sjá hér.

Það sem þetta þýðir er að dagurinn í dag er í raun dagurinn þar sem við erum að jafna okkur. 

Að hann sé aðeins rólegri en flestir dagar og við vinnum aðeins minna þótt við séum á staðnum er eðlilegt.

Svo eðlilegt reyndar að í raun ættu vinnustaðir jafnvel að gera ráð fyrir rólegum degi. Árið 2024 voru áhrif forsetakosninganna í Bandaríkjunum rannsökuð í atvinnulífinu. Meðal annars fjárhagsleg áhrif.

Sérfræðingur í mannauðsmálum sem MarketWatch ræddi þá við sagði þann dag sem skipti mestu máli vera vinnudaginn í kjölfar kosninga. Þar sem hluti hópsins mætti til vinnu ánægður með kosningarnar en hluti ekki.

Þessum málum tengdum voru fyrirtæki beinlínis hvött til að draga úr álagi strax eftir kosningar. Meðal annars með aðgerðum eins og:

Að halda færri fundi

Forðist skilatíma verkefna næstu daga á eftir

Leyfa jafnvel meiri heimavinnu/fjarvinnu og minnka þannig spennustig á vinnustaðnum

Hvað svo sem er best að gera má að minnsta kosti ætla að ef rólegheitin svífa yfir vötnum á einhverjum vinnustöðum í dag og einhverjir aukakaffibollar eru drukknir megi ætla að allt sé þetta liður í því að lítið samfélag var í heild sinni að kjósa sér nýja forystu um land allt, með tilheyrandi spennustigi.

Sem búmm! Nú er lokið.