Anora óvæntur sigurvegari á Óskarnum

Oddur Ævar Gunnarsson skrifar 3. mars 2025 05:57

Sean Baker leikstjóri myndarinnar og Mikey Madison ásamt öðrum aðstandendum Anora fögnuðu vel í nótt. Kevin Winter/Getty Images

Kvikmyndin Anora fékk flest verðlaun á Óskarsverðlaunahátíðinni sem fram fór vestanhafs í nótt. Myndin fékk alls sex verðlaun á hátíðinni í nótt og var meðal annars valin besta myndin. Þá varð leikstjóri myndarinnar Sean Baker sá fyrsti til að vinna fjögur verðlaun fyrir sömu myndina.

Verðlaunahátíðin fór fram með pompi og prakt í 97. skiptið í Dolby kvikmyndahúsinu í nótt. Conan O' Brien var kynnir í þetta skiptið. Anora sem er um bandaríska kynlífsverkakonu sem giftist syni rússnesks ólígarks fékk verðlaun í flokki bestu myndar, bestu klippingar, bestu leikstjórn, besta frumsamið handrit auk þess sem aðalleikkonan Mikey Madison bar sigur úr býtum sem besta leikkonan.

Adrien Brody hlaut verðlaun í flokki besta leikarans fyrir hlutverk sitt í kvikmyndinni The Brutalist og skaut þar leikaranum Timothée Chalamet ref fyrir rass sem fór með hlutverk Bob Dylan í A Complete Unknown. Þá var kvikmyndin Flow fyrsta lettneska myndin til þess að vinna til verðlauna í flokki teiknimynda. Zoe Saldana hlaut svo verðlaun í flokki aukaleikkonu fyrir hlutverk sitt í kvikmyndinni Emilia Pérez.

Í opnunarræðu sinni gerði Conan O' Brien meðal annars stólpagrín að sjálfum sér í æsku.

Myndin Emilia Pérez, sem fjallar um mexíkóska trans konu sem jafnframt er eiturlyfjabarón, hafði einmitt hlotið flestar tilnefningar fyrir kvöldið í kvöld eða alls þrettán talsins. Var fyrir fram talið líklegast að hún myndi hreppa flest verðlaun. Myndin hlaut hinsvegar einungis tvenn Óskarsverðlaun. Wicked hlaut tvenn, The Brutalist þrjú, A Complete Unknown engin og Conclave ein verðlaun.

Í þakkarræðu sinni vék leikstjóri Anora Sean Baker sérstaklega að kynlífsverkafólki og þakkaði því fyrir að deila sögum sínum með honum. Hann sagðist tileinka því verðlaun sín. Mynd hans fjallar eins og áður segir um Anoru kynlífsverkakonu frá Brooklyn sem kemst í hann krappan þegar hún giftist syni rússnesks ólígarks. Foreldrar hans taka giftinguna ekki í sátt og gera sitt besta til að það verði ógilt. Baker sagði verðlaunin sérlegan sigur fyrir sjálfstæða kvikmyndagerð og hvatti fólk til að sækja kvikmyndahús heim.