Arn­dís Anna kjörin for­maður Siðmenntar

„Það leggst ótrúlega vel í mig, ég er ótrúlega spennt fyrir þessu verkefni,“ segir Arndís Anna en hún hefur verið virkur félagi í Siðmennt um árabil.

Þrír einstaklingar buðu sig fram til formanns eftir að Inga Auðbjörg Straumland tilkynnti að hún myndi ekki sækjast eftir endurkjöri. Hún hafði gegnt embættinu í sex ár.

Arndís Anna segist vilja iðka sýnileika félagsins og efla samstöðu meðal annarra lífsskoðunarfélaga líkt og Siðmennt. Hún segir ákveðna ógn starfa gegn þeirra grunngildum, svo sem grunnvirðingu fyrir manneskjunni og gildi mannsins í sjálfum sér.

„Ég held að Siðmennt geti verið leiðandi í ákveðinni baráttu í vörn gegn þessari ógn,“ segir Arndís Anna.

„Ég er spennt og hef trú á því að með samstöðu og aukinni umræðu um það sem skipti rokkur máli þá getum við haldið aftur af þessari neikvæðri.“

Auk Arndísar Önnu voru þeir Sigurður Rúnarsson og Svanur Sigurbjörnsson í framboði. Sigurður dró síðan framboð sitt til baka.

Af 56 greiddum atkvæðum hlaut Arndís Anna 35 atkvæði en Svanur tuttugu. Sigurður hlaut eitt atkvæði en hafði þá þegar dregið framboðið sitt til baka.

Siðmennt er félag siðrænna húmanista á Íslandi. Á heimasíðu þeirra segir að siðrænir húmanistar leggi áherslu á siðræn gildi og þekkingarleit án vísana í yfirnáttúruleg fyrirbrigði.