Svekktar og reiðar yfir við­brögðum veitingamannsins

Ásta var á þorrablótinu í Grímsnesi með fjölskyldu sinni. Níu af fjórtán fjölskyldumeðlimum urðu veik af matareitrun og þar á meðal dóttir Ástu, Silva Ásthildur Skjalddal, sem varð mjög veik og frá vinnu í heila viku.

Alls veiktust um 140 manns á þorrablótunum í Borg og í Ölfusi sem fóru fram sömu helgina. Veisluþjónusta Suðurlands sá um veitingarnar á báðum blótum. Niðurstaða rannsóknar MAST leiddi í ljós að veisluþjónustan var ekki með starfsleyfi, aðstaða til handþvottar var ekki fullnægjandi, að kælikeðja matvælanna rofnaði á þorrablótunum og maturinn hafði staðið í töluverðan tíma án kælingar. 

Niðurstöður sýna frá fólki og úr matvælum bentu jafnframt til þess að orsakavaldur hópsýkingarinnar gæti verið svokallaður enteropathogenic E. coli (EPEC) og/eða Bacillus cereus-bakteríur sem fundust í sviða- og svínasultu sem var í boði á blótinu. Ekki tókst að rannsaka öll matvælin þar sem eitthvað kláraðist eða hafi verið hent. 

„Ég fór heim um tvö og þetta var allt byrjað svona hálf fjögur, fjögur. Þá byrjaði ég bara í rauninni að pissa með rassinum,“ segir Silva í samtali við fréttastofu.

Hún segist ekki hafa leitað sér læknisaðstoðar vegna þess að vinkona hennar hafi verið búin að því og hafi fengið leiðbeiningar vegna matareitrunar. Silva taldi þá nærri öruggt að þær væru að glíma við það sama og fór eftir sömu leiðbeiningum.

„Ég hélt fyrst að þetta væri bara ég. En vinkona mín fékk um 39 stiga hita og ég fékk vægan hita.“

Enn slæm í maganum

Tólf dagar eru frá því að hún veiktist en hún segist enn vera að glíma við eftirköst veikindanna og þurfi sem dæmi að passa hvað hún borðar.

„Ég borða eiginlega bara skyr, grænmeti og ávexti. Ég prófaði að fá mér kjöt um daginn en það fór heiftarlega í magann á mér. Ég varð mjög lasin það kvöld,“ segir Silva.

Hún segir niðurstöður rannsóknar MAST ekki hafa komið henni á óvart. Hún segist hafa orðið fyrir miklum vonbrigðum með viðbrögð veitingamannsins í viðtali á sunnleska.is.

„Ég var frá vinnu í heila viku. Vinnuveitandi minn sýndi þessu mikinn skilning. Maður veit alveg að þetta getur gerst en viðbrögð veitingamannsins gerðu mann reiðan og svekktan, eins og hann væri fórnarlambið í þessum aðstæðum,“ segir Silva.

Hefði viljað sjá meiri auðmýkt

Ásta tekur undir þessi orð og segir að hún hefði viljað sjá meiri auðmýkt í orðum Árna Bergþórs, sem sá um veitingarnar á þorrablótunum í Borg og Ölfusi, í viðtölum sem hann fór í í kjölfar veikindanna.

„Dóttir mín var fyrst að veikjast strax um nóttina. Tengdadóttir mín og sonur minn fylgdu svo. Þegar þau þrjú voru öll orðin veik vissi ég að þetta hlyti að vera matareitrun. Það er munur á uppgangs- og niðurgangspest og þessu.“

Sár og reið

Ásta skrifaði langa færslu um málið á Facebook í dag þar sem hún segist ekki ætla að versla aftur við Veisluþjónustu Suðurlands.

„Við værum örugglega ekki enn að tala um þetta nema því okkur sárnar hvernig veitingamaðurinn talar um þetta. Það er það sem stendur upp úr. Maður er sár og reiður því manni finnst hann mörgum sinnum í viðtölum við fjölmiðla vega að gestunum. Ef hann hefði sýnt auðmýkt og verið leiður þá væri enginn að tala um þetta,“ segir Ásta en í færslu sinni segir hún hann gaslýsa gesti og ófrægja þá í viðtölum. 

Hún á von á því að þetta hafi einhverjar afleiðingar fyrir veitingamanninn en eins og kom fram að ofan var hann ekki með leyfi og aðbúnaður ekki fullnægjandi. Aðrir gestir þorrablótanna taka undir orð Ástu í athugasemdum við færsluna hennar. 

„Ég tek það fram að ég þekki þennan mann ekki neitt en framkoma hans í þessu máli öllu er skólabókardæmi um hvernig á ekki að koma fram við fólk,“ segir Ásta að lokum í færslu sinni.