Skattrannsókn leiddi til gjald­þrots Davíðs Smára

Í Lögbirtingablaðinu í dag kemur fram að Davíð Smári hafi með úrskurði Héraðsdóms Vestfjarða þann 7. nóvember síðastliðinn verið úrskurðaður gjaldþrota. Skiptastjóri var skipaður yfir búinu sem lauk störfum innan við tólf vikum síðar.

Samkvæmt heimildum fréttastofu kom krafan um gjaldþrotaskipti frá Skattinum og var á grundvelli rannsóknar skattrannsóknarstjóra á skilum Davíðs Smára á opinberum gjöldum. Í slíkum rannsóknum krefst skattrannsóknarstjóri yfirleitt kyrrsetningar á eignum en þær virðast ekki hafa verið fyrir hendi. Skatturinn sektaði Davíð Smára og þegar hún fékkst ekki greidd krafðist Skatturinn gjaldþrots.

Davíð Smári sneri sér að knattspyrnuþjálfun fyrir nokkrum árum og fór með lið Kórdrengja upp um þrjár deildar á jafnmörgum árum, upp í næstefstu deild. Félagið heyrir í dag sögunni til. 

Davíð Smári var ráðinn til Vestra á Ísafirði og kom liðinu strax upp í efstu deild árið 2023. Liðið hélt sæti sínu í deildinni á síðasta tímabili.

Davíð segir í skriflegu svari við fyrirspurn fréttastofu að hann hvorki feli þá staðreynd né neiti að bú hans hafi verið tekið til gjaldþrotaskipta.

„Ég hef hins vegar átt í góðum samskiptum við skiptastjóra bús míns. Gert hefur verið grein fyrir málum öllum og spurningum hans svarað. Lengi skal manninn reyna. Undanfarin ár hef ég lagt á mig mikla vinnu til að snúa lífi mínu til betri vegar og er stoltur af því sem ég hef áorkað. Ég lít því spenntur til framtíðar,“ segir Davíð.