Heimir Már til liðs við Ingu og Flokk fólksins

Eftirsjá verður af Heimi Má á skjánum en hann hlaut verðskuldað blaðamannaverðlaun ársins í fyrra. Enn missir blaðamannastéttin einn af sínum helstu reynsluboltum og munar um minna.

„Ég hef starfað á fréttastofunni með nokkrum útúrdúrum í rúm tuttugu og fimm ár, frá því ég var fyrst ráðinn vorið 1991 þá 29 ára að aldri,“ segir Heimir Már.

Á að baki langan og frækinn feril

Heimir Már hefur undanfarin ár starfað á fréttastofu Stöðvar 2 og Bylgjunnar og síðar einnig Vísis.

„Ég hef unnið með mörgu frábæru fólki á öllum sviðum fréttastofu. Þar hef ég bæði lært mikið af öðru fólki en einnig fengið að spreyta mig á mjög fjölbreyttum verkefnum í fréttum, þáttagerð og þáttastjórnun og fyrir það er ég ákaflega þakklátur. Ég kveð góða vinnufélaga með söknuði en einnig stolti af þessari stærstu fréttastofu landsins, sem er í raun eina mótvægið við ríkismiðilinn RÚV.“

En nú taka ný verkefni við. Heimir segist spenntur fyrir þeim en bendir á að nú sé hann að hverfa á gamlar og kunnuglegar slóðir.

„Ég hef áður starfað á vettvangi Alþingis sem framkvæmdastjóri Alþýðubandalagsins á árunum 1996 til 1999. Það er kannski hollt að skipta um starf á að minnsta kosti 25 ára fresti,“ segir Heimir Már.

Ef einhver getur komið skikki á mannskapinn...

Fréttastofan kveður Heimi Má með söknuði – hann skilur eftir sig skarð sem verður erfitt að fylla.

„Við eigum eftir að sakna Heimis óskaplega enda hefur hann komið að uppeldi okkar flestra á fréttagólfinu. Hann hefur verið örlátur á ráð og leiðbeiningar - og alltaf hægt að fletta upp í minni hans og reynslu. En við óskum honum velfarnaðar í nýju starfi og það verður gaman að takast á við hann, þarna hinum megin við línuna,“ segir Erla Björg Gunnarsdóttir ritstjóri fréttastofu.

Gárungum þótti skondið þegar Flokkur fólksins auglýsti eftir upplýsingafulltrúa í miðju fári sem flokkurinn stóð þá frammi fyrir: Styrkjamálið svokallað og fréttaflutningi af símtali sem Inga Sæland, formaðurinn sjálfur, hafði átt við skólastjóra Borgarholtsskóla vegna tapaðs Nike-skós var í algleymingi. Ýmsum þótti sem þarna væri verk að vinna.

Og víst er að það verður í mörg horn að líta fyrir Heimi Má, en ef einhver getur komið skikki mannskapinn þá er það hann. Ekki er verra fyrir Flokk fólksins að njóta fulltingis manns sem þekki hvern krók og kima á fjölmiðlum, en að sama skapi erfitt fyrir fjölmiðla að eiga við hann.

Ráða einnig lögfræðing

Heimir Már er ekki eina breytingin sem Flokkur fólksins gerir á sínu liði. 

Í tilkynningu sem Guðmundur Ingi Kristinsson þingflokksformaður sendi út nú rétt í þessu flokkurinn sendi frá sér er einnig tilkynnt um að Katrín Viktoría Leiva hafi verið ráðin sem lögfræðingur þingflokksins.

Katrín lauk BA-prófi í lögfræði frá Háskólanum í Reykjavík árið 2012 og ML-prófi í lögfræði frá sama skóla árið 2014. Hluta meistaranámsins stundaði hún við lagadeild Kaupmannahafnarháskóla. Árið 2020 hlaut hún málflutningsréttindi fyrir héraðsdómstólum.