Segist mjög á­nægður og ekki hafa mis­reiknað sig

Þetta segir Einar Þorsteinsson, borgarstjóri og oddviti Framsóknar í Reykjavík eftir tvo líflega sólarhringa. Hann kveðst brattur þrátt fyrir að hugmynd hans um nýtt meirihlutasamstarf við Sjálfstæðisflokk, Viðreisn og Flokk fólksins hafi runnið út í sandinn í gærkvöldi þegar formaður hins síðarnefnda gaf út að Flokkur fólksins ætlaði ekki að vinna með Sjálfstæðisflokknum.

En þú verður þá að viðurkenna að þú hafir misreiknað stöðuna?

„Nei, alls ekki. Ég er bara mjög ánægður og tel að það hafi verið hárrétt, ég er ánægður með þá ákvörðun að láta kjósendur okkar vita að við erum ekki bara hérna til að hirða launatékka. Við erum til þess að berjast fyrir þeim málum sem við vorum kosin til að berjast fyrir. Það verða kosningar aftur. Ef ég lendi í minnihluta þá mun ég bara berjast fyrir málunum þaðan,“ sagði Einar við Kristján Kristjánsson í Sprengisandi á Bylgjunni.  

Það sé hins vegar rangt að lítið hafi verið um ágreining innan meirihlutans þó að forðast hafi verið að leiða hann upp á yfirborðið. Einar sagði að flokkarnir hafi til að mynda verið víða ósammála í leikskóla-, rekstrar-, flugvallar- og húsnæðismálum. 

Skammaður fyrir að nefna byggð í Geldinganesi

Einar nefnir að nú þegar bygging Sundabrautar er í undirbúningi komi að því að taka ákvörðun um gatnamót um Geldinganes og hversu mikið umferðarmagn þau þurfi að þola. Í tengslum við það standi borgin frammi fyrir því að ákveða hvort byggja eigi íbúðarhúsnæði á Geldinganesi eða ekki.

Borgarstjóri segist vera þeirrar skoðunar. Þar sé gott land og stutt að komast eftir að Sundabrautin er byggð.

„En þá er ég skammaður af samstarfsflokkum mínum fyrir að færa þetta einu sinni í orð. Núna er verið að tala um að það hafi ekki verið neinn ágreiningur. Að borgarstjóri megi ekki nefna það að það sé tímabært og mjög praktísk nálgun að taka ákvörðun um það að byggja í Geldinganesi að þá fari allt á hliðina. Að það sé bara sagt „það er mjög alvarlegt að borgarstjóri leyfi sér að ræða um þetta. Þetta er ekki stefna meirihlutans.“

Var þetta sagt berum orðum við þig?

„Jájá. Af því að hér kemur hver borgarfulltrúinn fram sem ég var í samstarfi með og segir: „Já en það var enginn ágreiningur.“ Ég meina ég tel nú þetta kallast ágreining.“

Ekki eftirspurn eftir vinstrimeirihluta

Einar segir að einnig hafi hagræðingartillögur hans í borginni mætt andstöðu innan samstarfsflokkanna og hann fengið athugasemdir frá Samfylkingunni þegar hann hafi opinberlega rætt hugmyndir um rekstur leikskóla með atvinnurekendum.

Hann telur að borgarbúar séu ekki að biðja um nýjan meirihluta Samfylkingar, Viðreisnar, Pírata, Sósíalista og Vinstri grænna sem virðist vera líklegasti kosturinn þessa stundina. 

Einar kom eins og stormsveipur inn í borgarmálin í síðustu sveitarstjórnarkosningum og gekk til liðs við þáverandi meirihluta. Hann segist vissulega hafa kosið að mynda frekar annan meirihluta til hægri en sá kostur hafi ekki verið í boði eftir kosningarnar. Ekki hafi verið sjálfgefið að Framsókn, Samfylking, Píratar og Viðreisn næðu saman enda margt sem greini að stefnu Framsóknar annars vegar og Samfylkingar og Pírata hins vegar. 

Mörg mál hafi reynst Framsókn erfið og borgarfulltrúar flokksins ekki náð að klára og keyra í gegn þau mál sem mestu skipti máli. 

„Það var okkar mat að við kæmust ekki lengra og við skulduðum kjósendum sem flykktust á bakvið Framsókn að standa á okkar meiningu.“

Fréttin hefur verið uppfærð.