Rubio fundaði með Mulino og í­trekaði hótanir Trump

Utanríkisráðherrann sagði það afstöðu Bandaríkjanna að áhrif Kínverja á svæðinu væru of mikil og ef ekki yrði tafarlaus breyting á myndu Bandaríkjamenn grípa til aðgerða. Ástandið væri óásættanlegt.

Mulino ítrekaði á móti að yfirráð yfir skurðinum væru ekki til umræðu; skurðurinn væri undir stjórn Panama og yrði áfram.

Forsetinn sagði að fundurinn hefði verið á kurteisislegum nótum og bauðst meðal annars til að aðstoða yfirvöld í Bandaríkjunum við að koma ólöglegum innflytjendum aftur til síns heima, ef Bandaríkjamenn greiddu fyrir það.

Þá sagði hann að stjórnvöld í Panama hefðu ekki í hyggju að halda áfram þátttöku í svokallaðri „belt and road“ áætlun Kínverja. Áætlunin gengur út á gríðarlega uppbyggingu innviða til að efla efnahagsleg áhrif Kínverja um allan heim.

Mikil mótmæli brutust út í Panama í tengslum við heimsókn Rubio en heimamenn eru síður en svo ánægðir með hótanir Bandaríkjamanna.