Real Sociedad, lið Orra Óskarssonar, mátti þola 2-0 tap er liðið heimsótti Osasuna í spænsku úrvalsdeildinni í kvöld.
Þrátt fyrir að hafa skorað tvö mörk gegn PAOK í Evrópudeildinni í síðasta leik Real Sociedad þurfti Orri að sæta sig við bekkjarsetu í upphafi leiks.
Orri kom þó inn af varamannabekknum á 66. mínútu, en þá var staðan orðin 1-0, Osasuna í vil, eftir mark frá Ante Budimir. Budimir var svo aftur á ferðinni rétt rúmum stundarfjórðungi fyrir leikslok.
Orri lagaði stöðuna fyrir gestina á fjórðu mínútu uppbótartíma, en nær komst liðið ekki.
Niðurstaðan því 2-1 sigur Osasuna sem nú situr í sjöunda sæti spænsku deildarinnar með 30 stig eftir 22 leiki, tveimur stigum meira en Real Sociedad sem situr í tíunda sæti.
