Töl­fræðin á móti Egyptum: Aron og Viggó fóru fyrir sókninni þegar mest á reyndi

Varnarleikurinn og markvarslan var áfram í fyrsta flokki og það var magnað að sjá þann stöðugleika hjá strákunum okkar. Sóknarleikurinn á enn eitthvað inni en það var gaman að sjá tvo leikmenn fara fyrir sókninni í seinni hálfleiknum.

Aron Pálmarsson og Viggó Kristjánsson tóku hvað eftir annað af skarið á mikilvægum tíma í seinni hálfleiknum og sáu til þess að Egyptarnir voru áfram í hæfilegri fjarlægð.

Það er gaman að sjá íslenska liðið vinna alla leiki sína á mótinu en með vörn og markvörslu í þessum ham eru liðinu allir vegir færir.

Egyptar skoruðu ekki fyrsta markið sitt fyrr en eftir sjö og hálfa mínútu en íslenska liðið var sjálft reyndar aðeins búið að skora tvö mörk á þessum upphafsmínútum. Viktor Gísli Hallgrímsson hafði ekki mikið kólnað niður frá því í Slóveníuleiknum og varði sjö af fyrstu ellefu skotunum sem komu á hann. Hann var með tíu varin og 53 prósent markvarsla í fyrri hálfleiknum.

Dauðafærin héldu þó áfram að fara forgörðum því egypski markvörðurinn Karim Handawy varði ellefu skot í fyrri hálfleiknum. Aðeins fjórir íslenskir leikmenn skoruðu í fyrri hálfleiknum, Aron Pálmarsson tók af skarið, Orri Freyr Þorkelsson nýtti færin frábærlega og Viggó Kristjánsson var mjög öruggur á vítalínunni. Það þurftu fleiri að fara að skila mörkum.

Vörnin var samt áfram til mikillar fyrirmyndar og íslenska liðið hélt Egyptum undir tíu mörkum í hálfleiknum og leiddi með fjórum mörkum í hálfleik, 13-9.

Íslenska liðið hélt velli í seinni hálfleik, markvarslan datt aðeins niður en í sókninni skoruðu Viggó Kristjánsson og Aron Pálmarsson mörg mikilvæg mörk.

Þeir áttu báðir þátt í tíu mörkum í leiknum. Gísli Þorgeir Kristjánsson spilaði líka vel í leikstjórnendahlutverkinu og þá sérstaklega í seinni hálfleiknum þegar hann var líka að búa til fyrir liðsfélagana.

Vísir fylgist vel með tölfræði íslenska liðsins á mótinu og hefur nú tekið saman þá leikmenn sem sköruðu fram úr í tölunum í þessum fjórða leik Íslands á mótinu.

Hér fyrir neðan má sjá toppa íslenska liðsins í tölfræðinni.