Ein­kunnir Strákanna okkar á móti Slóveníu: Viktor! Gísli! Hall­gríms­son!

Með sigrinum er ljóst að Ísland vinnur G-riðil og tekur með sér fjögur stig í milliriðla sem hefjast á miðvikudaginn. Þar mæta Íslendingar Egyptum, Króötum og Argentínumönnum.

Íslenska liðið mætti gríðarlega einbeitt til leiks í kvöld og fyrri hálfleikurinn var nær fullkominn, sérstaklega hvað vörn og markvörslu varðar. Þá skoraði Ísland sjö mörk eftir hraðaupphlaup í fyrri hálfleik.

Íslendingar náðu heljartaki á leiknum með 6-0 kafla um miðbik fyrri hálfleiks og komst í 4-11. Sóknarleikurinn gekk misjafnlega eftir þetta, allt of mörg dauðafæri fóru í súginn og þá fékk Ísland níu brottvísanir.

En varnarleikurinn var magnaður allan tímann og Viktor Gísli var ótrúlegur í markinu. Hann varði átján skot í leiknum.

Mestur varð munurinn níu mörk, 10-19, og Íslendingar unnu á endanum glæsilegan fimm marka sigur á liði sem endaði í 4. sæti á Ólympíuleikunum í fyrra.

Líkt og áður þá gefur íþróttadeild Vísis og Stöðvar tvö leikmönnum og þjálfaranum einkunnir fyrir frammistöðu sína.

Leikmenn og þjálfarar fá einkunn á bilinu 1-6 með umsögn, en neðst í fréttinni má sjá hvað hver einkunn þýðir.

Einkunnir Íslands gegn Slóveníu:

- Byrjunarlið Íslands í leiknum -

Viktor Gísli Hallgrímsson, markvörður - 6 (18/1 varin skot - 52:33 mín.) VÁ! VÁ! VÁ! Þvílík frammistaða hjá Viktori Gísla. Hann var magnaður allt frá fyrstu mínútu og varði hvert dauðafærið á fætur öðru. Það var enn mikilvægara í ljósi allra brottvísanna sem Íslendingar fengu. Einn besti landsleikur Viktors Gísla sem hefur verið einn besti, ef ekki besti markvörður mótsins.

Orri Freyr Þorkelsson, vinstri hornamaður - 4 (3 mörk - 52:13 mín.) Skoraði þrjú mörk úr fjórum skotum og var góður í vörninni. Hefur stimplað sig inn í landsliðið með glæsibrag.

Elvar Örn Jónsson, vinstri skytta - 5 (1 mörk - 30:46 mín.) Fékk þrjár brottvísanir og rautt spjald í upphafi seinni hálfleiks. En var algjörlega mergjaður í vörninni meðan hans naut við. Er til betri varnarmaður í heiminum, pund fyrir pund? Þeir eru allavega ekki margir.

Janus Daði Smárason, leikstjórnandi - 4 (3 mörk - 30:12 mín.) Gaf tóninn með því að skora tvö mörk í byrjun leiks og var frábær í vörninni allan tímann. Grjótharður maður gegn manni. Gerði nokkur mistök í sókninni en heilt yfir stórfín frammistaða hjá Janusi.

Viggó Kristjánsson, hægri skytta - 5 (7/4 mörk - 57:28 mín.) Það mæddi gríðarlega mikið á Viggó í leiknum en hann spilaði nánast allan tímann. Gríðarlega sterkur í vörninni og var öruggur á vítalínunni. Skoraði fjögur mörk þaðan og gaf einnig fjórar stoðsendingar. Skotnýtingin var ekkert sérstök en Viggó var íslenska liðinu ómetanlegur í leiknum.

Óðinn Þór Ríkharðsson, hægri hornamaður 2 (1 mark - 53:00 mín.) Fínn í vörninni en klikkaði á þremur dauðafærum sem hefði getað reynst dýrt.

Ýmir Örn Gíslason, línumaður 5 (0 mörk - 35:34 mín.) Var í vígahug og spilaði nánast óaðfinnanlega í vörninni. Ógnarsterkur, var úti um allt og stöðvaði ófáar sóknirnar. Mögnuð frammistaða hjá Ými.

- Menn sem komu inn af bekknum í leiknum -

Björgvin Páll Gústavsson, markvörður - (spilaði ekkert)

Elliði Snær Viðarsson, línumaður 4 - (2 mörk - 40:44 mín.) Fékk þrjár brottvísanir eins og Elvar en var sterkur í vörninni meðan hann var inni á. Eyjamaðurinn skoraði líka tvö mörk og skilaði flottri frammistöðu.

Gísli Þorgeir Kristjánsson, leikstjórnandi 4 - (1 mörk - 23:04 mín.) Var í miklum ham og sótti ítrekað á vörn Slóveníu. Fékk ef til vill ekki alltaf það sem hann átti skilið hjá dómurum leiksins en fiskaði nokkrar brottvísanir og eitt víti. Stýrði sóknarleiknum heilt yfir ágætlega.

Aron Pálmarsson, vinstri skytta 5 - (5 mörk - 30:51 mín.) Kom inn á um miðjan fyrri hálfleik og þvílík innkoma! Skoraði fjögur mörk í fyrri hálfleik og gaf þrjár stoðsendingar. Skoraði líka fyrsta mark Íslands í seinni hálfleik sem var mikilvægt og kom sóknarleiknum aftur í gang. Aron var líka öflugur í vörninni að vanda.

Teitur Örn Einarsson, hægri skytta - (2:31 mín.) Kom inn á þegar Viggó fékk brottvísun í fyrri hálfleik. Spilaði annars ekkert.

Sigvaldi Björn Guðjónsson, hægri hornamaður - (5:20 mín.) Kom inn á í lokin eftir að Óðinn brenndi af þriðja færinu sínu. Klikkaði á einu erfiðu færi.

Bjarki Már Elísson, vinstri hornamaður - (5:44 mín.) Leysti Orra af þegar hann fékk brottvísun og meiddist svo lítillega í seinni hálfleik.

Einar Þorsteinn Ólafsson, varnarmaður - (spilaði ekkert)

Þorsteinn Leó Gunnarsson, vinstri skytta (spilaði ekkert)

Snorri Steinn Guðjónsson, þjálfari 6 Íslenska liðið spilaði stórkostlega vörn í leiknum, einhverja þá bestu sem það hefur sýnt í áraraðir. Vörnin hefur heilt yfir verið góð síðan Snorri tók við en þetta var langbesta útgáfan af henni. Hraðaupphlaupin gengu frábærlega í fyrri hálfleik og alls skoruðu Íslendingar tíu hraðaupphlaupsmörk. Það reyndist mikilvægt vegna allra dauðafæranna sem fóru forgörðum. Íslenska leikmennirnir voru líka eldsnöggir að skila sér til baka í vörn og Slóvenía skoraði aðeins tvö mörk eftir hraðaupphlaup í leiknum. Snorri var með svör við öllu sem Slóvenarnir buðu upp á og skákaði og mátaði Uros Zorman, kollega sinn.

Útskýring á einkunnum