Bað um nýtt her­bergi í Zagreb

Aðspurður um aðstæðurnar grínast Elliði með það að hafa kvartað yfir herbergi hans og Gísla Þorgeirs Kristjánssonar við Ívar Benediktsson, ritstjóra Handbolta.is. Full bjart sé þar innandyra og að þeir hafi beðið um nýtt herbergi.

„Manni er bara farið að líða eins og maður sé heima. Við fengum nýtt herbergi, ég og Gísli, ég var að kvarta yfir því við Ívar Ben í gær. Nei, nei, það var svolítið bjart í herberginu okkar, við drógum fyrir en þá var enn svo bjart. En manni líður bara vel hér,“ segir Elliði léttur um aðstæðurnar í króatísku höfuðborginni. Hann svaf þrátt fyrir það nokkuð vel.

„Ég svaf reyndar frábærlega. Það var ekki nema maður hafði reynt við síðdegislúr, það hefði verið erfitt,“ segir Elliði.

Loksins komið að þessu

Ísland lék tvo æfingaleiki við Svía í síðustu viku og hefur liðið æft frá því í lok desember. Elliði segir gott að þeim undirbúningi fari að ljúka og stóra stundin að bresta á.

„Undirbúningurinn hefur verið rosalega góður. Við erum búnir að æfa ótrúlega vel og það er hellingur sem við getum tekið út úr þessum tveimur leikjum við Svía. Loksins er undirbúningurinn bara búinn og loksins komið að þessu,“ segir Elliði. Undirbúningur hans, persónulega, gekk þó ekki áfallalaust fyrir sig þar sem hann fékk að líta rautt spjald í fyrri Svíaleiknum eftir að hafa verið á vellinum í örfáar mínútur.

„Maður er ekki ennþá vaxinn upp úr þessu að fá þessi rauðu spjöld inn á milli. En er ekki fínt að klára það bara fyrir mót?“

Elliði var að glíma við meiðsli skömmu fyrir mót en náði þó að spila einn leik fyrir félag sitt, Gummersbach í Þýskalandi, áður en hann kom til móts við landsliðið. Hann segist vera laus við þau meiðsli og er klár í slaginn.

„Ég er orðinn alveg góður. Ég náði einum heilum leik með Gummersbach áður en ég kom hingað. Ég finn ekkert fyrir þessu eftir að ég byrjaði að æfa með landsliðinu. Ég er kominn með grænt ljós og hundrað prósent heill. Það eru engar afsakanir,“

Alltaf pressa á liðinu

Hverjar eru væntingarnar fyrir komandi mót?

„Bara góðar. Það er gamla góða klisjan: Einn leikur í einu. Ef við byrjum þetta vel á morgun, það er fyrsti leikur í milliriðli því við vitum ekki hvort liðanna kemur með okkur áfram. Þetta eru allt tveggja stiga leikir fyrir milliriðilinn en við þurfum að byrja að einbeita okkur að þessum verkefnum, klára þessa fyrstu þrjá leiki og sjá svo hvernig landið liggur,“ segir Elliði. En er pressa á liðinu?

„Það er alltaf pressa að spila fyrir landsliðið. Það er bara gott. Það er tilfinning sem þú vilt hafa. Þú vilt ekki fara inn í leiki of léttur, það er gott að hafa þessa pressu,“

„Hún kemur úr öllum áttum. Við viljum spila betur og sýna okkur frá síðasta móti. Svo er alltaf pressa frá íslensku þjóðinni, sem er bara gott,“ segir Elliði.

Fleira kemur fram í viðtalinu sem má sjá í spilaranum.

Leikur Íslands og Grænhöfðaeyja er klukkan 19:30 annað kvöld. Strákunum okkar verður fylgt vel á eftir á Vísi, Stöð 2 og Bylgjunni fram að leik.