Óróahviður í Mýrafjöllum sagðar líkjast að­draganda Reykjaneselda

Jarðskjálfti upp á 3,2 stig, sem varð í fyrrakvöld við Grjótárvatn í fjöllunum ofan Mýra, var að sögn náttúruvársérfræðings Veðurstofunnar sá stærsti frá upphafi mælinga, eða frá því skjálftakerfi Veðurstofunnar var tekið í notkun árið 1991.

Haraldur Sigurðsson eldfjallafræðingur, sem er úr Stykkishólmi, næsta nágrannabæ Ljósufjalla, segir Ljósufjallakerfið núna hafa látið vita af sér með meiri virkni en þar hafi sést í 86 ár. Hann rifjar upp í færslu á facebook-síðu sinni stóra skjálftahrinu sem varð í fjöllunum árið 1938.

„Við þurfum að fara aftur til ársins 1938 til að sjá meiri skjálftavirkni í Ljósufjallakerfinu, en þá gerðust stór tíðindi. Hinn 10. febrúar 1938 gengu yfir ellefu skjálftar sem voru á bilinu 4,2 til 5,2 af stærð, staðsettir um 32 kílómetra suðsuðaustur af Stykkishólmi, eða í miðju Ljósufjalla. Stórskjálftavirknin stóð yfir um sex klukkutíma. Ég fékk mínar upplýsingar í skrá um eldri skjálfta á vef Veðurstofunnar,“ segir Haraldur og bætir við:

„Þessi skjálftavirkni hlýtur að hafa fundist í byggð, einkum á Skógaströnd og í Miklholtshreppi, en ekki er mér kunnugt um ritaðar heimildir. Aðeins ellefu stærstu skjálftarnir eru í skránni, en sjálfsagt hafa gengið yfir hundruð smærri skjálfta þennan dag.“

„Vaxandi virkni við Grjótarvatn og órói,“ er fyrirsögn pistils á facebook-síðu Eldfjalla- og náttúruvárhóps Suðurlands.

„Síðustu daga hafa komið fram nokkrar „óróahviður“ á skjálftamælum á svæðinu. Ein slík sást eftir miðnætti 16. desember og birtist hún á gröfum sem þétt röð smáskjálfta. Var hún yfirstaðin á um 15 mínútum.“

Önnur sambærileg óróahviða hafi komi fram á mælum aðfaranótt 18. desember. Stóri skjálftinn við Grjótarvatn hafi reynst 3,2 að stærð og fundist vítt um Vesturland. Í framhaldinu hefði nokkur fjöldi skjálfta mælst, sá stærsti 2,5 að stærð.

„Álíka óróahviður voru töluvert í umræðunni í aðdraganda eldsumbrotanna á Reykjanesskaga. Eru þær gjarnan taldar tákna lítil kvikuinnskot, það er að segja að kvika leitar upp í jarðskorpuna.

Virknin í Ljósufjallakerfinu hefur vaxið verulega á þessu ári. Sést það glögglega í þeirri staðreynd að rúmlega 50 skjálftar yfir tvo að stærð hafa mælst á árinu, en þeir voru bara tveir allt síðasta ár. Nýr skjálftamælir var settur upp á svæðinu nýlega sem bætir nákvæmni mælinga og mælir um leið minni atburði en áður.

Virknin virðist enn sem komið er bundin við töluvert dýpi og var stóri skjálftinn í gær til dæmis á um 15 kílómetra dýpi. Skjálftarnir í dag hafa verið á allt að 20 kílómetra dýpi, sem þykir mjög djúpt fyrir íslenskar aðstæður,“ segir í pistli Suðurlandshópsins, sem birtist í gærkvöldi.

Hér má sjá frétt Stöðvar 2 í gærkvöldi um jarðhræringarnar: